നിലമ്പൂര്‍: നഗരസഭയില്‍ റിലയന്‍സ് ഇന്‍ഫോ കോം ലിമിറ്റഡിന് അനുമതി നല്‍കിയത് സംബന്ധിച്ച പരാതി അത്യന്തം ഗൗരവമുള്ളതാണെന്നും പരിശോധിച്ച് ഉടനടി നടപടി സ്വീകരിക്കുമെന്നും തദ്ദേശ സ്വയംഭരണ വകുപ്പ് പ്രിന്‍സിപ്പല്‍ സെക്രട്ടറി ടി.കെ ജോസ്. നഗരസഭ കൗണ്‍സിലര്‍ പി.എം ബഷീര്‍ തിരുവനന്തപുരത്ത് എത്തി പ്രിന്‍സിപ്പല്‍ സെക്രട്ടറിയോട് കാര്യങ്ങള്‍ വിശദീകരിച്ചതിനെ തുടര്‍ന്നാണ് അദ്ദേഹം തീരുമാനം അറിയിച്ചത്.
നഗരസഭ കൗണ്‍സിലര്‍മാരായ പി.എം ബഷീര്‍, മുസ്തഫ കളത്തുംപടിക്കല്‍, പി ഗോപാലകൃഷ്ണന്‍ എന്നിവര്‍ പ്രിന്‍സിപ്പല്‍ സെക്രട്ടറിക്കും  നഗരകാര്യ ഡയറക്ടര്‍ ഡോ. വാസുകിയക്കും പരാതി നല്‍കിയിരുന്നു. നഗരസഭാ കൗണ്‍സിലിന്റെ തീരുമാനമില്ലാതെ ചെയര്‍മാന്‍ മുന്‍കൂര്‍ അനുമതി നല്‍കിയത് ചട്ടലംഘനമാണെന്ന് ഉദ്യോഗസ്ഥര്‍ തന്നെ സമ്മതിക്കുന്നു. തറവാടക വേണ്ടെന്ന് വയ്ക്കാനുള്ള അധികാരം കൗണ്‍സിലിന് പോലുമില്ലാതിരിക്കെ സെകട്ടറിയും ചെയര്‍പേഴ്‌സണും നടത്തിയത് ഗുരുതരമായ നിയമവിരുദ്ധ പ്രവര്‍ത്തനമാണെന്ന് ഉദ്യോഗസ്ഥരെ നേരിട്ട് ബോദ്ധ്യപ്പെടുത്തി. സംഭവം പരിശോധിക്കുമെന്ന് പ്രിന്‍സിപ്പല്‍ സെക്രട്ടറി ഉറപ്പ് നല്‍കി. അതിനിടെ, നഗരസഭ ചെയര്‍പേഴ്‌സന്‍ 8.3.2017 ന് മുന്‍കൂര്‍ അനുമതി നല്‍കിയത് നഗരസഭാ കൗണ്‍സില്‍ നടന്ന അതേദിവസമാണെന്നതും ശ്രദ്ധേയമാണ്. കഴിഞ്ഞ ഒരു വര്‍ഷമായി മിനുട്ട്‌സിന്റെ ചുമതലയുള്ള ഉദ്യോഗസ്ഥന്‍ കൗണ്‍സിലര്‍മാര്‍ക്ക് നല്‍കാതിരുന്നതും സര്‍ക്കാറിലേക്ക് അയക്കാതിരുന്നതും ദൂരൂഹത വര്‍ധിപ്പിക്കാനിടയാക്കിയിരിക്കുകയാണ്. മിനുട്ട്‌സ് പിടിച്ചെടുത്ത് അന്വേഷണം നടത്തണമെന്ന് കൗണ്‍സിലര്‍മാര്‍ ആവശ്യപ്പെട്ടു. 2017 മാര്‍ച്ച് മാസം നടന്ന യോഗങ്ങളില്‍ റിലയന്‍സിന് അനുകൂലമായി തീരുമാനങ്ങള്‍ എഴുതി ചേര്‍ത്ത് നിയമ വിരുദ്ധ നടപടി നിയമ വിധേയമാക്കാന്‍ ഗൂഢശ്രമങ്ങള്‍ നടക്കുന്നതായി ബഷീര്‍ ഉന്നത ഉദ്യോഗസ്ഥരെ ബോധ്യപ്പെടുത്തി.