കുവൈത്ത് സിറ്റി: കുവൈത്തിലെ പ്രശസ്ത മലയാളി ഡോക്ടറും എറണാകുളം രാമമംഗലം സ്വദേശിയുമായ ഡോ: നാരായണന്‍ നമ്പൂതിരി അന്തരിച്ചു. 68 വയസായിരുന്നു. കഴിഞ്ഞ ആറ് മാസമായി അര്‍ബുദ രോഗബാധയെതുടര്‍ന്ന് ചികിത്സയിലായിരുന്നു. രണ്ടു മാസം മുന്‍പാണ് ഇദ്ദേഹത്തെ വിദഗ്ധ ചികിത്സാര്‍ത്ഥം അമേരിക്കയില്‍ മയോ ക്ലിനിക്കില്‍ പ്രവേശിപ്പിച്ചത്. ഒരാഴ്ചയായി രോഗം കലശലായിരുന്നതിനെ തുടര്‍ന്ന് ഐ.സി.യുവില്‍ പ്രവേശിപ്പിച്ചിരിക്കുകയായിരുന്നു.

കുവൈത്തിലെ സാമൂഹ്യ സാംസ്‌കാരിക മണ്ഡലങ്ങളില്‍ നിറസാന്നിധ്യമായിരുന്ന ഡോക്ടര്‍ ഇവിടെ സബാ ആശുപത്രിയിലെ നെഫ്രോളജി വിഭാഗത്തിന്റെ തലവനായിരുന്നു. നിരവധി കിഡ്‌നി മാറ്റിവയ്ക്കല്‍ ശസ്ത്രക്രിയകള്‍ക്ക് നേതൃത്വം നല്‍കിയ ഡോക്ടര്‍ കുവൈത്ത് രാജകുടുംബം ഏറ്റവും അംഗീകരിക്കുകയും ആദരിക്കുകയും ചെയ്ത വ്യക്തിത്വം കൂടിയായിരുന്നു.
കുവൈത്തിലെ ഇന്ത്യന്‍ ഡോക്‌റ്റേഴ്‌സ് ഫോറത്തിന്റെ സ്ഥാപക അധ്യക്ഷനായിരുന്നു. ദീര്‍ഘകാലം സംഘടനയെ നയിച്ചു.
ഭാര്യ ഡോ: പ്രഭ ഇവിടെ മെഡിക്കല്‍ സര്‍വകലാശാലയില്‍ പാതോളജി വിഭാഗം പ്രൊഫസറായിരുന്നു. മക്കള്‍: സജിത, വിഷ്ണു എന്‍.എസ്.എസ് കുവൈത്ത്, ഐ.സി.സി വെല്‍ഫെയര്‍ കമ്മിറ്റി, ഒ.ഐ.സി.സി കുവൈത്ത്, കുവൈത്ത് മലയാളി സമാജം എന്നീ സംഘടനകള്‍ ഡോ: നാരായണന്‍ നമ്പൂതിരിയുടെ നിര്യാണത്തില്‍ അനുശോചിച്ചു.