കൊണ്ടോട്ടി: ശംസുല്‍ ഉലമ ഇ.കെ അബൂബക്കര്‍ മുസ്‌ലിയാരുടെ തുല്യതയില്ലാത്ത സേവനങ്ങളും ആശയങ്ങളും കൂടുതല്‍ പ്രചരിപ്പിക്കേണ്ടതുണ്ടെന്നും ആ ദൗത്യം നിര്‍വഹിക്കേണ്ടത് പിന്‍ഗാമികളായ ദാരിമിമാരാണെന്നും സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ പറഞ്ഞു. വേള്‍ഡ് ദാരിമീസ് ഓര്‍ഗനൈസേഷന്റെ സമൂഹമാധ്യമ കൂട്ടായ്മയുടെ ലോഞ്ചിങ് നിര്‍വഹിക്കുകയായിരുന്നു തങ്ങള്‍.
മുണ്ടക്കുളം ശംസുല്‍ ഉലമ കോംപ്ലക്‌സില്‍ നടന്ന ചടങ്ങില്‍ അബ്ദുല്‍ കരീം ദാരിമി കൊളത്തറ അധ്യക്ഷനായി. നന്തി ദാറുസ്സലാം ജന. സെക്രട്ടറി എ.വി അബ്ദുറഹ്മാന്‍ മുസ്‌ലിയാര്‍ ആമുഖഭാഷണം നടത്തി. അബൂബക്കര്‍ ദാരിമി പുല്ലാര പദ്ധതി വിശദീകരിച്ചു. ഫഖ്‌റുദ്ദീന്‍ തങ്ങള്‍ ദാരിമി കണ്ണന്തളി, റഷീദ് അലി ശിഹാബ് തങ്ങള്‍ ദാരിമി പാണക്കാട്, അബ്ദുല്‍ ഗഫൂര്‍ ദാരിമി മുണ്ടക്കുളം, സലീം ദാരിമി ചര്‍ള, ആസിഫ് ദാരിമി പുളിക്കല്‍, അബ്ദുല്ല ദാരിമി വെള്ളില, അബ്ദുല്‍ ജബ്ബാര്‍ ദാരിമി ആലുവ സംബന്ധിച്ചു. അബ്ദുല്‍ മജീദ് ദാരിമി വളരാട് സ്വാഗതവും ഉസ്മാന്‍ ദാരിമി പന്തിപ്പൊയില്‍ നന്ദിയും പറഞ്ഞു.