ന്യൂഡല്‍ഹി: മുനമ്പത്തേത് വഖഫ് ഭൂമി തന്നെയെന്നതാണ് മുസ്‌ലിം ലീഗിന്റെ നിലപാടെന്ന് ദേശീയ ഓര്‍ഗനൈസിങ് സെക്രട്ടറി ഇ.ടി മുഹമ്മദ് ബഷീര്‍ പ്രതികരിച്ചു. വിഷയത്തില്‍ പ്രതിപക്ഷനേതാവുമായി ഏറ്റുമുട്ടലിനില്ലെന്നും അദ്ദേഹം കൂട്ടിച്ചേര്‍ത്തു. മുനമ്പത്തേത് വഖഫ് ഭൂമിയല്ലെന്ന് ലീഗ് ഒരു ഘട്ടത്തിലും പറഞ്ഞിട്ടില്ല. വഖഫ് ഭൂമിയാണ് എന്ന സത്യം നിലനിര്‍ത്തി പ്രശ്‌നപരിഹാരത്തിന് സര്‍ക്കാര്‍ തയ്യാറാകണമെന്നും അദ്ദേഹം ആവശ്യപ്പെട്ടു. 

മുനമ്പത്ത് താമസിക്കുന്നവരെ കുടിയൊഴിപ്പിക്കരുതെന്നാണ് മുസ്‌ലിം ലീഗ് നിലപാടെന്ന് സംസ്ഥാന അധ്യക്ഷന്‍ പാണക്കാട് സാദിഖലി തങ്ങള്‍. ഇക്കാര്യത്തില്‍ ലീഗിന്  യാതൊരു ആശയക്കുഴപ്പമില്ലെന്നും ചൂണ്ടിക്കാട്ടി. 

എന്നാല്‍ മുനമ്പം വിഷയത്തില്‍ ലീഗിന് ഒറ്റ അഭിപ്രായം മാത്രമാണുള്ളതെന്നും അത് സാദിഖലി തങ്ങള്‍ പറഞ്ഞതാണെന്നും ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയും വ്യക്തമാക്കി. മുനമ്പം വഖഫ് ഭൂമിയല്ലെന്ന് ആരും പറഞ്ഞിട്ടില്ലെന്നും കുടിയൊഴിപ്പിക്കുന്നത് സംബന്ധിച്ചാണ് ചര്‍ച്ചയെന്നും അദ്ദേഹം കൂട്ടിച്ചേര്‍ത്തു.