ലഖ്‌നൗ: യു.പിയിലെ ഗാസിയാബാദില്‍ മക്കളോടൊപ്പം ബൈക്കില്‍ സഞ്ചരിക്കുമ്പോള്‍ അക്രമി സംഘത്തിന്റെ വെടിയേറ്റ മാധ്യമപ്രവര്‍ത്തകന്‍ മരിച്ചു. തലയ്ക്ക് വെടിയേറ്റ് ഗുരുതരാവസ്ഥയില്‍ കഴിയുകയായിരുന്ന വിക്രം ജോഷിയാണ് മരിച്ചത്. തലയില്‍ ഞരമ്പുകള്‍ക്ക് സാരമായ ക്ഷതമേറ്റിരുന്നതായി വിക്രം ജോഷിയെ ചികിത്സിച്ച ഡോക്ടര്‍ അറിയിച്ചു. തിങ്കളാഴ്ച രാത്രിയാണ് മാധ്യമപ്രവര്‍ത്തകന് വെടിയേറ്റത്.
മാധ്യമപ്രവര്‍ത്തകന്റെ അനന്തരവളെ ഒരു സംഘം ഉപദ്രവിച്ചിരുന്നു. ഇതിനെതിരേ പൊലിസില്‍ പരാതി നല്‍കി നാലാം ദിവസമാണ് ജോഷിക്ക് വെടിയേറ്റത്. അനന്തരവളെ ഉപദ്രവിച്ച സംഘമാണ് ആക്രമത്തിന് പിന്നിലെന്ന് കുടുംബം ആരോപിച്ചു.
കേസില്‍ ഒന്‍പതു പേരെ അറസ്റ്റ് ചെയ്തു. ഒരാളെ പിടികൂടാനുണ്ട്.

ന്യൂഡല്‍ഹി: ഗാസിയാബാദില്‍ മാധ്യമപ്രവര്‍ത്തകന്‍ വെടിയേറ്റ് മെരിച്ച സംഭവത്തില്‍ യു.പി സര്‍ക്കാരിനെതിരേ വിമര്‍ശനവുമായി കോണ്‍ഗ്രസ് നേതാവ് രാഹുല്‍ ഗാന്ധി. രാമ രാജ്യം വാഗ്ദാനം ചെയ്തവര്‍ ഗുണ്ടാ രാജ്യമാണ് തന്നതെന്ന് രാഹുല്‍ ആരോപിച്ചു. മാധ്യമപ്രവര്‍ത്തകന്റെ കുടുംബത്തിന് അനുശോചനമറിയിച്ചുള്ള പോസ്റ്റിലായിരുന്നു രാഹുല്‍ ഗാന്ധിയുടെ പ്രതികരണം.'അനന്തരവളെ ഉപദ്രവിച്ചവര്‍ക്കെതിരേ പ്രതികരിച്ച മാധ്യമപ്രവര്‍ത്തകന്‍ വിക്രം ജോഷി കൊല ചെയ്യപ്പെട്ടിരിക്കുന്നു. അദ്ദേഹത്തിന്റെ മരണത്തില്‍ ഞാന്‍ അനുശോചനം രേഖപ്പെടുത്തുന്നു. രാമ രാജ്യം വാഗ്ദാനം ചെയ്തവര്‍, ഗുണ്ടാ രാജ്യമാണ് പകരം തരുന്നത്,' രാഹുല്‍ ട്വീറ്റ് ചെയ്തു.