തിരുവനന്തപുരം: ശബരിമല വിശ്വാസങ്ങളെയും ആചാരാനുഷ്ഠാനങ്ങളെയും കാത്തുസംരക്ഷിക്കുമെന്ന് ഉറപ്പു നല്‍കുകയും തെരഞ്ഞെടുപ്പ് പ്രകടനപത്രികയില്‍ വ്യക്തമായി രേഖപ്പെടുത്തുകയും ചെയ്ത ബി.ജെ.പി നയിക്കുന്ന എന്‍.ഡി.എക്കായിരിക്കും ശബരിമല അയ്യപ്പസേവാ സമാജം വോട്ട് നല്‍കുകയെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.

ലോക്‌സഭാ തെരഞ്ഞെടുപ്പില്‍ സീറ്റ് ലഭിച്ചില്ലെങ്കിലും സുപ്രിംകോടതിവിധിയുടെ മറവില്‍ ആചാരലംഘനം നടത്തുമെന്ന് പറഞ്ഞ സംസ്ഥാന സര്‍ക്കാരിനുള്ള തിരിച്ചടിയാകും തെരഞ്ഞെടുപ്പ്. ഇടതുപക്ഷവും കോണ്‍ഗ്രസും അയ്യപ്പ വിശ്വാസികളെ കബളിപ്പിക്കുന്നതില്‍ മത്സരിക്കുകയാണ്. വിശ്വാസികള്‍ക്ക് അനുകൂലമായ നിലപാട് സ്വീകരിക്കുന്ന സര്‍ക്കാരിനു വേണ്ടി വോട്ട് ചെയ്യും. ഓരോ ജില്ലയിലും അയ്യപ്പഭക്തരുടെ കൂട്ടായ്മകള്‍ സംഘടിപ്പിക്കും. ഇന്ന് ശബരിമല കര്‍മസമിതിയുടെ ആഭിമുഖ്യത്തില്‍ അഞ്ചാംഘട്ട സമരപരിപാടികള്‍ക്ക് സെക്രട്ടേറിയറ്റ് നടയില്‍ തുടക്കം കുറിക്കുമെന്നും ഭാരവാഹികള്‍ പറഞ്ഞു.

വാര്‍ത്താസമ്മേളനത്തില്‍ എസ്.എ.എസ്.എസ് ഓള്‍ ഇന്ത്യ ചെയര്‍മാന്‍ ടി.ബി ശേഖര്‍, ജനറല്‍ സെക്രട്ടറി ഈറോഡ് രാജന്‍, കര്‍ണാടക പ്രസിഡന്റ് കൃഷ്ണപ്പ, വിനോദ്കുമാര്‍ എന്നിവര്‍ പങ്കെടുത്തു.