അബുദബി: ബഹ്‌റൈൻ, കുവൈത്ത്, ജോർദാൻ എന്നീ രാജ്യങ്ങളെ ലക്ഷ്യമിട്ട് ഇറാൻ മിസൈലുകളും ഡ്രോണുകളും ഉപയോഗിച്ച് വീണ്ടും നടത്തിയ ആക്രമണങ്ങളെ ശക്തമായി അപലപിച്ച് യുഎഇ. ഈ ആക്രമണങ്ങൾ സഹോദര രാഷ്ട്രങ്ങളുടെ പരമാധികാരത്തിന്മേലുള്ള നഗ്നമായ ലംഘനമാണെന്ന് യുഎഇ വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി.

മേഖലയുടെ സുരക്ഷയ്ക്കും സ്ഥിരതയ്ക്കും കനത്ത ഭീഷണിയുയർത്തുന്നതാണ് ഇറാന്റെ ഇത്തരം നടപടികളെന്ന് മന്ത്രാലയം കുറ്റപ്പെടുത്തി.

പൂർണ്ണ പിന്തുണ പ്രഖ്യാപിച്ച് യുഎഇ

ബഹ്‌റൈൻ, കുവൈത്ത്, ജോർദാൻ എന്നീ രാജ്യങ്ങളുമായി യുഎഇയുടെ പൂർണ്ണമായ ഐക്യദാർഢ്യം വിദേശകാര്യ മന്ത്രാലയം ആവർത്തിച്ചു പ്രഖ്യാപിച്ചു.

ആക്രമണങ്ങളുടെ പശ്ചാത്തലത്തിൽ ഈ രാജ്യങ്ങളുടെ സുരക്ഷയും സ്ഥിരതയും പരമാധികാരവും സംരക്ഷിക്കുന്നതിനായി അവർ കൈക്കൊള്ളുന്ന എല്ലാവിധ പ്രതിരോധ നടപടികൾക്കും യുഎഇയുടെ പൂർണ്ണ പിന്തുണയുണ്ടാകുമെന്ന് പ്രസ്താവനയിൽ ചൂണ്ടിക്കാട്ടി.

ഹോർമുസ് കടലിടുക്കിൽ യുഎഇയുടെ ടാങ്കറുകളായ 'മൊംബാസ', 'അൽ ബഹിയ' എന്നിവയ്ക്ക് നേരെ ഇറാൻ ക്രൂയിസ് മിസൈൽ ആക്രമണം നടത്തിയതായി യുഎഇ പ്രതിരോധ മന്ത്രാലയം നേരത്തെ അറിയിച്ചിരുന്നു. ഇതിന് പിന്നാലെയാണ് മേഖലയിലെ മറ്റ് രാജ്യങ്ങൾക്ക് നേരെയും ഇറാന്റെ ആക്രമണമുണ്ടായിരിക്കുന്നത്.

മേഖലയിൽ സമാധാനവും സുരക്ഷിതത്വവും നിലനിർത്താൻ അന്താരാഷ്ട്ര സമൂഹം അടിയന്തരമായി ഇടപെടണമെന്ന് നയതന്ത്ര പ്രതിനിധികൾ ആവശ്യപ്പെട്ടു.

The UAE strongly condemned the reported Iranian attacks targeting Bahrain and Kuwait, reaffirming support for regional security, sovereignty, and diplomatic efforts to maintain Gulf stability.