അരീക്കോട്: ആദിവാസി കോളനിയില്‍ പ്രസവിച്ച യുവതിക്ക് പ്രഥമ ചികിത്സ ലഭിച്ചത് ഒന്‍പത് മണിക്കൂറിന് ശേഷം. ഊര്‍ങ്ങാട്ടീരി പഞ്ചായത്തിലെ മൈലാടി ആദിവാസി കോളനിയിലെ സുബ്രമണ്യന്റെ ഭാര്യ ഗീത (20)യാണ് കഴിഞ്ഞ ദിവസം രാത്രി പ്രസവിച്ചത്.
കഴിഞ്ഞ 18 ന് ആശുപത്രിയിലെത്തി പരിശോധന നടത്തിയ ഇവര്‍ക്ക് ജൂണ്‍ ഒന്നിനായിരുന്നു പ്രസവ തിയതി പറഞ്ഞിരുന്നത്. കഴിഞ്ഞ ദിവസം രാത്രി 9ന് വേദന അനുഭവപ്പെട്ടെങ്കിലും ഊരിലുള്ളവര്‍ കാര്യമാക്കിയില്ല.
തുടര്‍ന്ന് ഒരു മണിക്കൂറിന് ശേഷം യുവതി പെണ്‍കുഞ്ഞിന് ജന്മം നല്‍കുകയായിരുന്നു. രാത്രി സമയമായതിനാല്‍ നാട്ടിലിറങ്ങി ആരേയും അറിയിക്കാന്‍ സാധിച്ചില്ല.
പിന്നീട് ഇന്നലെ രാവിലെ 5.30 ന് ഓടക്കയം പി.എച്ച്.സിയിലെ പ്രമോട്ടറായ മോഹന്‍ദാസിനെ വിവരമറിയിക്കുകയായിരുന്നു.
കാലത്ത് 7.30 ന് ജൂനിയര്‍ പബ്ലിക് ഹെല്‍ത്ത് നഴ്‌സ് ജമീലയുടെ നേതൃത്വത്തില്‍ മെഡിക്കല്‍ സംഘം മൈലാടി കോളനിയിലെത്തിയപ്പോഴേക്കും യുവതി ചികിത്സ ലഭിക്കാതെ അവശയായിരുന്നു. തുടര്‍ന്ന് മഞ്ചേരി മെഡിക്കല്‍ കോളജില്‍ പ്രവേശിപ്പിച്ച കുഞ്ഞിനെയും യുവതിയെയും തീവ്രപരിചരണ വിഭാഗത്തില്‍ പ്രവേശിപ്പിച്ചെങ്കിലും ആരോഗ്യനില തൃപ്തികരമായതോടെ വാര്‍ഡിലേക്ക് മാറ്റി. 1.850 കിലോ തൂക്കമുള്ള കുഞ്ഞിനും അമ്മക്കും ആരോഗ്യ പ്രശ്‌നങ്ങളൊന്നുമില്ലെന്ന് ഡോക്ടര്‍മാര്‍ പറഞ്ഞു.
മൈലാടി കോളനിയിലേക്ക് യാത്രാ സൗകര്യമില്ലാത്തതാണ് യുവതി ചികിത്സ ലഭിക്കാന്‍ മണിക്കൂറുകള്‍ കാത്തിരിക്കേണ്ടി വന്നത്. നാല് കിലോമീറ്റര്‍ ദൂരം നടന്ന് വേണം ഇവര്‍ താമസിക്കുന്ന ഊരുകളിലെത്താന്‍.