തേനി: പട്ടിണിക്കെതിരായ മിന്നലാക്രമണമാണ് കോണ്‍ഗ്രസ് പ്രകടനപത്രികയിലെ ന്യായ് പദ്ധതിയെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. തമിഴ്‌നാട്ടിലെ തേനിയില്‍ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം.

ഞങ്ങളുടെ പ്രകടനപത്രികയിലെ കേന്ദ്ര ആശയം ന്യായ് ആണ്. മോദിയുടെ വാഗ്ദാനങ്ങള്‍ ഞങ്ങള്‍ നടപ്പാക്കാന്‍ പോവുകയാണ്. രാജ്യത്തെ 20 ശതമാനം വരുന്ന പരമ ദരിദ്രര്‍ക്ക് ഒരു വര്‍ഷം 72,000 രൂപ വീതം നല്‍കും. അഞ്ചു കോടി കുടുംബങ്ങള്‍ക്ക് ഈ പണം ലഭിക്കും. വീട്ടിലെ സ്ത്രീകള്‍ക്കാണിത് കിട്ടുക.

മോദി ചോദിച്ചുവാങ്ങാനുള്ള ശേഷി നിങ്ങളില്‍ ഇല്ലാതാക്കിയിരിക്കുന്നു.
തൊഴിലില്ലായ്മ വര്‍ധിക്കുകയും സമ്പദ്‌വ്യവസ്ഥ തകരുകയും ചെയ്തു. അതിനെ പ്രതിരോധിക്കാനാണ് ന്യായ് പദ്ധതി. ഇന്ത്യന്‍ സാമ്പത്തികരംഗത്ത് കുതിച്ചുചാട്ടമുണ്ടാക്കുന്നതാണ് ന്യായ്. സമ്പദ്‌വ്യവസ്ഥയുടെ എന്‍ജിന്‍ ഞങ്ങള്‍ ഒന്നുകൂടി സ്റ്റാര്‍ട്ടാക്കാന്‍ പോവുകയാണ്. അനില്‍ അംബാനി, നീരവ് മോദി, മെഹുല്‍ ചോസ്‌കി തുടങ്ങിയവരില്‍ നിന്ന് പണം വരും. ഇന്ത്യയില്‍ പണത്തിനു കുറവില്ല- രാഹുല്‍ പറഞ്ഞു.