കൊച്ചി: ഒന്നേകാല്‍ കിലോ കഞ്ചാവും,10 ഓളം നൈട്രോസന്‍ ഇനത്തില്‍പെട്ട മയക്കുമരുന്ന് ഗുളികകളുമായി കൊച്ചിയില്‍ നാലുപേര്‍ പൊലിസ് പിടിയിലായി. കോഴിക്കോട് സ്വദേശി, പയ്യപ്പിള്ളി വീട്ടില്‍ തോമസ് ജോസ്(19), ആന്ധ്രപ്രദേശ് ,ഗുണ്ടൂര്‍ സ്വദേശി സൂര്യ കിരണ്‍(29), കൊല്ലം ആലുംകടവില്‍ അഷര്‍ മന്‍സിലില്‍ അഷര്‍(18),എന്നിവരാണ് എറണാകുളം സെന്‍ട്രല്‍ പൊലിസ് സ്റ്റേഷനില്‍ പിടിയിലായത്.
വിദ്യാര്‍ഥികളെ  കേന്ദ്രീകരിച്ചുള്ള കഞ്ചാവ് മാഫിയക്കെതിരെ സിറ്റിപൊലിസ് കമ്മിഷണര്‍ക്ക് ലഭിച്ച രഹസ്യവിവരത്തിന്റെ അടിസ്ഥാനത്തില്‍ ജില്ലാ ക്രൈംബ്രാഞ്ച് അസിസ്റ്റന്റ് കമ്മീഷണര്‍ എം രമേശ്കുമാറിന്റെ നിര്‍ദേശപ്രകാരം ഷാഡോ സബ് ഇന്‍സ്‌പെക്ടര്‍ ഹണി കെ ദാസിന്റെ നേതൃത്വത്തില്‍ രഹസ്യനിരീക്ഷണത്തിലായിരുന്നു പിടിയിലായ പ്രതികള്‍. ഇവരുടെ ഫോണില്‍ നിന്ന് ലഭിച്ച സന്ദേശങ്ങളഉടെ അടിസ്ഥാനത്തില്‍ സ്ത്രീകളടക്കമുള്ളവര്‍ക്ക് കഞ്ചാവ് എത്തിച്ചുകൊടുക്കുന്നതും, അത് ഉപയോഗിക്കാന്‍ പടിപ്പിക്കുകയും ചെയ്യുന്നതിന്റെ ദൃശ്യങ്ങള്‍ പൊലിസിന് ലഭിച്ചു.  
വിദ്യാര്‍ഥികളെ കേന്ദ്രീകരിച്ചും, വിദ്യാര്‍ഥികളെ ഇടനിലക്കാരാക്കിയും പ്രവര്‍ത്തിക്കുന്ന മയക്കുമരുന്ന് മാഫിയക്കെതിരെ ഷാഡോ പൊലിസ് ശക്തമായ നിരീക്ഷണമാണ് കൊച്ചി സിറ്റിയില്‍ നടത്തിവരുന്നത്. എറണാകുളം സെന്‍ട്രല്‍ പൊലിസ് സബ് ഇന്‍സ്‌പെക്ടര്‍ നിതീഷിന്റെ, നേതൃത്വത്തില്‍  പ്രതികളെ അറസ്റ്റ് ചെയ്തു കേസ് അന്വേഷണം ആരംഭിച്ചു.
ഷാഡോ അഡീഷണല്‍ സബ്ഇന്‍സ്‌പെക്ടര്‍ നിത്യാനന്ദപൈ , സിവില്‍ പൊലിസ് ഓഫീസര്‍മാരായ അഫ്‌സല്‍ ഹരിമോന്‍, വിശാല്‍, യൂസഫ്, സുനില്‍, രാഹുല്‍ എന്നിവര്‍ റെയ്ഡില്‍ പങ്കെടുത്തു.