കരിപ്പൂര്‍: കരിപ്പൂര്‍ വിമാന ദുരന്തത്തില്‍ മരിച്ചവരുടെ കുടുംബങ്ങള്‍ക്ക് 10 ലക്ഷം രൂപ ധനസഹായം പ്രഖ്യാപിച്ച് കേന്ദ്രവും കേരളവും. കേന്ദ്രവ്യോമയാന മന്ത്രി
ഹര്‍ദീപ് സിങ് പുരിയാണ് കേന്ദ്ര സഹായധനം പ്രഖ്യാപിച്ചത്. സാരമായി പരിക്കേറ്റവര്‍ക്ക് രണ്ടു ലക്ഷം രൂപയും നിസാരമായി പരുക്കേറ്റവര്‍ക്ക് 50,000 രൂപയും നല്‍കുമെന്നും അദ്ദേഹം അറിയിച്ചു. മുഖ്യമന്ത്രി പിണറായി വിജയനാണ് സംസ്ഥാനത്തിന്റെ സഹായധനം പ്രഖ്യാപിച്ചത്.
വിമാന ദുരന്തസ്ഥലം കേന്ദ്ര വ്യോമയാന മന്ത്രിയും മുഖ്യമന്ത്രിയും കേരള ഗവര്‍ണറും സന്ദര്‍ശിച്ചു. കരിപ്പൂര്‍ ദുരന്തത്തില്‍ കേന്ദ്രമന്ത്രി അതീവ ദുഖം രേഖപ്പെടുത്തി. വിമാനത്താവളം അധികൃതരും ഭരണകൂടവും കൃത്യമായി ഇടപെട്ടു. നാട്ടുകാരുടെ സമയോചിതമായ ഇടപെടലാണ് അപകട വ്യാപ്തി കുറച്ചതെന്ന് മന്ത്രി ഹര്‍ദീപ് സിങ് പുരി പറഞ്ഞു.

ദുരന്തത്തില്‍ 18 പേര്‍ക്കാണ് ജീവന്‍ നഷ്ടമായത്. 23 പേര്‍ ആശുപത്രി വിട്ടു. 149 പേരാണ് നിലവില്‍ ആശുപത്രികളില്‍ ചികിത്സയിലുള്ളതെന്ന് വ്യോമയാന മന്ത്രി പറഞ്ഞു.
വിമാനത്തിന്റെ രണ്ട് ബ്ലാക്ക് ബോക്‌സുകള്‍ ലഭിച്ചു. ഇത് പരിശോധിക്കും. ഫ്‌ളൈറ്റ് റെക്കോര്‍ഡുകളും കണ്ടെത്തി. ഊഹാപോഹങ്ങള്‍ക്ക് ഇപ്പോള്‍ പ്രസക്തിയില്ലെന്നും അദ്ദേഹം പറഞ്ഞു. കേന്ദ്ര സഹമന്ത്രി വി.മുരളീധരനും വാര്‍ത്താ സമ്മേളനത്തില്‍ പങ്കെടുത്തു.