കോഴിക്കോട്/കൊച്ചി: മണ്ണിനും മനസ്സിനും കുളിരേകി സംസ്ഥാനത്ത് വേനല്‍മഴയെത്തി. ഇന്നലെ വൈകിട്ടോടെ സംസ്ഥാനത്തിന്റെ ഒട്ടുമിക്ക ജില്ലകളിലും മഴ ലഭിച്ചു. രണ്ടു ദിവസംകൂടി മഴ തുടരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു.

മഴയെത്തുടര്‍ന്ന് ഇന്നും നാളെയും കേരളത്തില്‍ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കൊച്ചി മുളന്തുരുത്തിയില്‍ മഴക്കിടെയുണ്ടായ മിന്നലില്‍ രണ്ടുപേര്‍ മരിച്ചു.
പലയിടങ്ങളിലും മഴ രാത്രിയിലും തുടരുകയാണ്. മലപ്പുറം ജില്ലയില്‍ ഇന്ന് കനത്തമഴക്ക് സാധ്യതയുള്ളതിനാല്‍ കാലാവസ്ഥാ നിരീക്ഷണ കേന്ദ്രം യെല്ലോ അലര്‍ട്ട് പ്രഖ്യാപിച്ചു.
24 മണിക്കൂറിനിടെ ഏഴുമുതല്‍ 11 സെ.മി വരെ മലപ്പുറത്തെ ഒന്നോ രണ്ടോ സ്ഥലങ്ങളില്‍ മഴ ലഭിക്കാമെന്നാണ് പ്രവചനം. ഇന്നലെ തിരുവനന്തപുരം, കൊല്ലം, ആലപ്പുഴ, കോട്ടയം, പത്തനംതിട്ട, എറണാകുളം, ഇടുക്കി, തൃശൂര്‍, മലപ്പുറം, പാലക്കാട്, കോഴിക്കോട്, കണ്ണൂര്‍, വയനാട് ജില്ലകളിലും മഴ ലഭിച്ചിട്ടുണ്ട്.
മഴക്കിടെയുണ്ടായ മിന്നലിലാണ് കൊച്ചി മുളന്തുരുത്തിയില്‍ സ്ത്രീയും ഭര്‍തൃസഹോദരിയുടെ മകനും മരിച്ചത്. മുളന്തുരുത്തി വെട്ടിക്കല്‍ മണ്ടോത്തുകുഴി വീട്ടില്‍ അനക്‌സ് ബിജു (15), ലിസി ജോണ്‍ (49) എന്നിവരാണ് മരിച്ചത്. ഇന്നലെ വൈകിട്ട് നാലുമണിയോടെ മിന്നലേറ്റ് ഇവര്‍ താമസിച്ചിരുന്ന വീട് തകരുകയും ഇവര്‍ക്ക് മിന്നല്‍ ഏല്‍ക്കുകയുമായിരുന്നു.

ബന്ധുക്കളും നാട്ടുകാരും ചേര്‍ന്ന് ആശുപത്രിയില്‍ എത്തിച്ചിരുന്നെങ്കിലും അതിനു മുന്‍പുതന്നെ ഇരുവരും മരിച്ചിരുന്നു. അനക്‌സിന്റെ മാതാപിതാക്കള്‍ നേരത്തെ മരിച്ചതാണ്. അവധിക്കാലം ആഘോഷിക്കാന്‍ അമ്മയുടെ സഹോദരന്റെ വീട്ടില്‍ എത്തിയതായിരുന്നു.