തിരുവനന്തപുരം: ട്രഷറിയില്‍നിന്നു രണ്ട് കോടിയിലധികം രൂപ തട്ടിയെടുത്ത സംഭവം പുറത്തുവന്ന സാഹചര്യത്തില്‍ സോഫ്റ്റ് വെയര്‍ പരിഷ്‌കരണത്തിന് സര്‍ക്കാര്‍ തീരുമാനം.
ഇതിനായി സെപ്ഷ്യല്‍ ഓഫിസറെ നിയമിച്ചു. ധനകാര്യ വകുപ്പിലെ ഇന്‍ഫര്‍മേഷന്‍ സിസ്റ്റംസ് ഡയറക്ടറായ ഡോ. കോശി വൈദ്യനെയാണ് സ്‌പെഷ്യല്‍ ഓഫിസറായി നിയോഗിച്ചിരിക്കുന്നത്. ട്രഷറി ഡയറക്ടറുമായി ചേര്‍ന്ന് ഇക്കാര്യങ്ങള്‍ പരിശോധിച്ച് ആറു മാസത്തിനുള്ളില്‍ സോഫ്റ്റ്‌വെയറിന്റെ സുരക്ഷാ സംവിധാനങ്ങള്‍ ഉറപ്പുവരുത്തണമെന്നും ഉത്തരവില്‍ നിര്‍ദേശിച്ചിട്ടുണ്ട്.
വിരമിച്ച, സ്ഥലം മാറ്റപ്പെട്ട, ഡെപ്യുട്ടേഷനില്‍പോയ, ദീര്‍ഘകാല അവധിയെടുത്ത, സസ്‌പെന്‍ഡ് ചെയ്യപ്പെട്ട ഉദ്യോഗസ്ഥരുടെ അക്കൗണ്ടുകള്‍ പ്രവര്‍ത്തന രഹിതമാക്കുന്നതിനുള്ള സംവിധാനം സോഫ്റ്റ് വെയറില്‍ ഉണ്ട്. എന്നാല്‍ ഇത് ചെയ്തു എന്നതിനു സന്ദേശങ്ങള്‍ ലഭിക്കുന്നതിനുള്ള സംവിധാനം ഉണ്ടാകണം. ബയോമെട്രിക് അല്ലെങ്കില്‍ ആധാര്‍ പോലെ തിരിച്ചറിയല്‍ സംവിധാനം ഏര്‍പ്പെടുത്തണം. പെര്‍ഫോമന്‍സ് ഓഡിറ്റും സുരക്ഷാ ഓഡിറ്റും നടത്തണം.
ഇത്തരത്തില്‍ മുന്‍കാലത്ത് നടന്നിട്ടുള്ള ഏതെങ്കിലും തട്ടിപ്പുകള്‍ ആഭ്യന്തര ഓഡിറ്റ് വിഭാഗം കണ്ടെത്തിയിട്ടുണ്ടോയെന്നു പരിശോധിക്കണമെന്നും സ്‌പെഷ്യല്‍ ഓഫിസറോട് സര്‍ക്കാര്‍ നിര്‍ദേശിച്ചിട്ടുണ്ട്.