കണ്ണൂര്‍: നഗരത്തില്‍ വിവിധയിടങ്ങളിലായി ബ്ലേഡ് സംഘങ്ങള്‍ പ്രവര്‍ത്തിക്കുന്നുണ്ടെന്ന വിവരത്തെ തുടര്‍ന്നു പൊലിസ് നടത്തിയ റെയ്ഡില്‍ ഒരാളെ അറസ്റ്റു ചെയ്തു. തളാപ്പ് പാറമ്മല്‍ വീട്ടില്‍ പി. ഫിറോസ് (35) ആണ് അറസ്റ്റിലായത്. ഇയാളില്‍ നിന്നു മൂന്നുലക്ഷം രൂപയും പണമിടപാടുമായി ബന്ധപ്പെട്ട രേഖകളും പിടിച്ചെടുത്തു.
കല്യാണ്‍ സില്‍ക്‌സ് ഷോറൂമില്‍ നിന്നു പണവുമായി മുങ്ങി അറസ്റ്റിലായ മാനേജര്‍ മഹേഷ് പൊലിസിനു നല്‍കിയ വിവരത്തെ തുടര്‍ന്നായിരുന്നു ഡിവൈ.എസ്.പി കെ.വി വേണുഗോപാലിന്റെ നേതൃത്വത്തിലുള്ള പൊലിസ് സംഘം പരിശോധന നടത്തിയത്. കണ്ണൂരില്‍ അനധികൃത പണമിടപാട് നടത്തുന്ന ഏതാനും പേരെ കുറിച്ചും പൊലിസിന് വിവരം ലഭിച്ചിട്ടുണ്ട്. ഇന്നലെ നാലു സംഘങ്ങളായി തിരിഞ്ഞായിരുന്നു പൊലിസ് പരിശോധന നടത്തിയത്.