കല്‍പറ്റ: രാഹുലിനെതിരെ പ്രചാരണത്തിന് കേന്ദ്രമന്ത്രി സ്മൃതി ഇറാനി നാളെ വയനാട്ടിലെത്തില്ല. നടുവേദന മൂലം സ്മൃതി വരില്ലെന്നും പകരം കേന്ദ്രമന്ത്രി നിര്‍മല സീതാരാമന്‍ നാളെ ബത്തേരിയില്‍ റോഡ് ഷോ നടത്തുമെന്നും എന്‍ഡിഎ നേതാക്കള്‍ അറിയിച്ചു.

നാളെ സ്മൃതി ഇറാനിക്കുള്ള സ്വീകരണ പരിപാടികളുടെ ഒരുക്കങ്ങള്‍ക്കിടെയാണ് അവര്‍ വരില്ലെന്ന അറിയിപ്പ് വയനാട്ടിലെ എന്‍ഡിഎ നേതാക്കള്‍ക്ക് ലഭിക്കുന്നത്. രാഹുല്‍ ഗാന്ധി മത്സരിക്കുന്ന മറ്റൊരു മണ്ഡലമായ അമേത്തിയിലെ ബിജെപി സ്ഥാനാര്‍ത്തികൂടിയായ സ്മൃതിയുടെ വരവ് വളരെ ആവേശത്തോടെയായിരുന്നു പാര്‍ട്ടി പ്രവര്‍ത്തകര്‍ കാത്തിരുന്നത്.

അതേസമയം നാളെ രാവിലെ പ്രത്യേക വിമാനത്തില്‍ കോഴിക്കോട്ടെത്തുന്ന നിര്‍മല 10.25ന് ബത്തേരി സെന്റ് മേരീസ് കോളജ് ഗ്രൗണ്ടില്‍ ഹെലികോപ്ടറില്‍ ഇറങ്ങും. തുടര്‍ന്ന് 10.30 ന് ഗാന്ധി ജംങ്ക്ഷനിലെ പൊതുയോഗം കഴിഞ്ഞ് ബത്തേരി ടൗണില്‍ റോഡ് ഷോ നടത്തും.