ചേര്‍ത്തല: പാതിരപ്പള്ളി എക്‌സല്‍ ഗ്ലാസസ് തുറന്നു പ്രവര്‍ത്തിക്കാന്‍ സര്‍ക്കാര്‍ അടിയന്തിര നടപടി സ്വീകരിക്കണമെന്ന് ആവശ്യപ്പെട്ട്  ബി.എം.എസ് ജില്ലാ കമ്മിറ്റിയുടെ നേതൃത്വത്തില്‍ തൊഴിലാളികള്‍ പ്രക്ഷോഭസമരത്തിലേയ്ക്ക്. കേരളത്തിലെ പ്രമുഖ വ്യവസായ ശാലകളില്‍ ഒന്നായ എക്‌സല്‍ ഗ്ലാസസ് പ്രവര്‍ത്തനം നിലച്ചിട്ട് എട്ടരവര്‍ഷമാകുന്നു. തൊഴിലാളികള്‍ക്ക് അര്‍ഹതപ്പെട്ട ആനുകൂല്യങ്ങള്‍ നല്‍കാന്‍ സര്‍ക്കാര്‍ ഒരു ചര്‍ച്ചയ്ക്കു തയ്യാറാകുന്നില്ല.
   2008 നു ശേഷം ഇരുനൂറോളം വരുന്ന ജീവനക്കാര്‍ക്കും പെന്‍ഷന്‍കാര്‍ക്കും ഗ്രാറ്റിവിറ്റി തുക നല്‍കിയിട്ടില്ല. എല്‍.ഡി.എഫിന്റെ തെരഞ്ഞെടുപ്പു വാഗ്ദാനമായിരുന്നു എക്‌സല്‍ ഗ്ലാസസ് തുറന്നു പ്രവര്‍ത്തിക്കുമെന്നത്. അധികാരത്തിലേറി ഒരു വര്‍ഷമായിട്ടും യാതൊരു നടപടിയും ഉണ്ടായിട്ടില്ല. തൊഴിലാളി സംഘടനകളെ വിളിച്ചുകൂട്ടി കമ്പനിയുടെ പ്രവര്‍ത്തനം ഒരുമാസത്തേയ്ക്ക്  നിര്‍ത്തിവെക്കുന്നതായി രേഖാമൂലം ആവശ്യപ്പെട്ടായിരുന്നു 2012 ല്‍ കമ്പനി അടച്ചുപൂട്ടിയത്.
പ്രവര്‍ത്തനം നടത്താത്ത മാസത്തെ വേതനം തൊഴിലാളികള്‍ക്ക് നല്‍കുമെന്നും പറഞ്ഞിരുന്നു. പിന്നീട് കമ്പനി നടത്തിപ്പുകാര്‍ തമ്മിലുള്ള ശീതസമരത്തെ തുടര്‍ന്ന്  സ്ഥാപനം അടച്ചുപൂട്ടുകയായിരുന്നു.
കമ്പനി ഉടന്‍ തുറന്നുപ്രവര്‍ത്തിക്കണമെന്നാവശ്യപ്പെട്ട് എക്‌സല്‍ ഗ്ലാസ് വര്‍ക്കിങ് എംപ്ലോയിസ് അസോസിയേഷന്റെ നേതൃത്വത്തില്‍  സമരപരിപാടികള്‍ ഉടന്‍ ആരംഭിക്കുമെന്ന് ബി.എം.എസ് ജില്ലാ സെക്രട്ടറി സി.ജി.ഗോപകുമാര്‍ പറഞ്ഞു. എം.എസ്.ശ്രീകുമാര്‍, ഒ.എന്‍ സുനില്‍കുമാര്‍, ഒ.ജെ ചാക്കോ എന്നിവരും വാര്‍ത്താസമ്മേളനത്തില്‍ പങ്കെടുത്തു.