പിണറായി: വടക്കന്‍ ജില്ലകളിലെ വിനോദസഞ്ചാര സാധ്യതകള്‍ ശരിയായ രീതിയില്‍ ഇതുവരെ ഉപയോഗപ്പെടുത്താനായിട്ടില്ലെന്നും ഇക്കാര്യത്തില്‍ അടിയന്തര നടപടി സ്വീകരിക്കാന്‍ സര്‍ക്കാര്‍ പദ്ധതികള്‍ ആവിഷ്‌ക്കരിച്ചതായും മുഖ്യമന്ത്രി പിണറായി വിജയന്‍. ധര്‍മടം സുസ്ഥിര വികസനത്തിലേക്കു വികസന സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം. വിനോദസഞ്ചാര മേഖലയുടെ വളര്‍ച്ചയ്ക്കാവശ്യമായ വിഭവങ്ങള്‍ വേണ്ടത്രയുള്ള പ്രദേശങ്ങളാണിവ. ധര്‍മടം മണ്ഡലത്തിലെ തന്നെ മുഴപ്പിലങ്ങാട് ബീച്ച്, ധര്‍മടം തുരുത്ത്, അതുമായി ബന്ധപ്പെട്ട പ്രദേശങ്ങള്‍ എല്ലാം കൂടിച്ചേര്‍ത്ത് വികസിപ്പിച്ചാല്‍ രാജ്യത്തെ മികവുറ്റ ടൂറിസ്റ്റ് കേന്ദ്രമാക്കി മാറ്റാനാകും. ഇക്കാര്യത്തില്‍ കലക്ടറുടെയും വിനോദസഞ്ചാര വിഭാഗത്തിന്റെയും നേതൃത്വത്തില്‍ നല്ല ശ്രമങ്ങള്‍ നടക്കുന്നുണ്ട്. മേഖലയുടെ ടൂറിസം സാധ്യതയെക്കുറിച്ച് പഠിച്ച് വിശദമായ റിപ്പോര്‍ട്ട് സമര്‍പ്പിക്കുന്നതിനു വിദഗ്ധ സംഘം അടുത്തദിവസം തന്നെ സ്ഥലം സന്ദര്‍ശിക്കും. ബീച്ചുകളുടെ ടൂറിസം സാധ്യതകള്‍ ഉപയോഗപ്പെടുത്തുന്നതിനുള്ള സഹായം കേന്ദ്രസര്‍ക്കാരും ഉറപ്പു നല്‍കിയിട്ടുണ്ട്.
വടക്കന്‍ജില്ലകളുടെ ടൂറിസം വികസനത്തിന് അനുകൂലമായ സാഹചര്യമാണു കണ്ണൂര്‍ വിമാനത്താവളം യാഥാര്‍ഥ്യമാവുന്നതോടെ ഉണ്ടാവാന്‍ പോകുന്നത്. നമ്മുടെ നാട്ടില്‍ നിര്‍മിക്കുന്ന പാരമ്പര്യ ഉല്‍പന്നങ്ങള്‍ക്കും കരകൗശല ഉല്‍പ്പന്നങ്ങള്‍ക്കും വന്‍ വിപണന സാധ്യതയാണ് ഇതു സൃഷ്ടിക്കുക. ഉത്തരവാദിത്ത ടൂറിസം നടപ്പാക്കുകയാണു സംസ്ഥാന സര്‍ക്കാരിന്റെ ലക്ഷ്യം. ഇതുമായി ബന്ധപ്പെട്ട് പഞ്ചായത്തുകളും ജനങ്ങളും നല്ലപോലെ സഹകരിക്കണമെന്നും മുഖ്യമന്ത്രി അറിയിച്ചു.
മുന്‍ എം.എല്‍.എ കെ.കെ നാരായണന്‍ അധ്യക്ഷനായി. കെ.കെ രാഗേഷ് എം.പി, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, കലക്ടര്‍ മീര്‍ മുഹമ്മദലി, കില ഡയറക്ടര്‍ ഡോ. പി.പി ബാലന്‍, മുഖ്യമന്ത്രിയുടെ മണ്ഡലം പ്രതിനിധി പി. ബാലന്‍, കെ.വി ഗോവിന്ദന്‍, കെ പ്രദീപന്‍, കെ.കെ രാജീവന്‍, എം.സി മോഹനന്‍, പി.കെ ഗീതമ്മ, ബേബി സരോജം, ടി.വി ലക്ഷ്മി, എന്‍.പി ഹബീസ്, കെ.കെ ഗിരീഷ് സംബന്ധിച്ചു.