കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ തീര്‍ഥാടനത്തിന് പോയവരുടെ മടക്ക യാത്രയ്ക്ക് സൗകര്യമൊരുക്കാന്‍ ഇന്ന് ഹജ്ജ് മന്ത്രിയുടെ നേതൃത്വത്തില്‍ യോഗം ചേരും. രാവിലെ 11ന് തിരുവനന്തപുരത്ത് ചേരുന്ന യോഗത്തില്‍ മന്ത്രി ഡോ.കെ.ടി ജലീല്‍, ഹജ്ജ് കമ്മിറ്റി ചെയര്‍മാന്‍ സി.മുഹമ്മദ് ഫൈസി തുടങ്ങിയവര്‍ സംബന്ധിക്കും.
അടുത്ത മാസം 12 മുതലാണ് മടക്ക സര്‍വിസുകള്‍ ആരംഭിക്കുന്നത്. പ്രളയക്കെടുതി മൂലം അടച്ചിട്ട നെടുമ്പാശ്ശേരി വിമാനത്താവളം ഇന്ന് മുതല്‍ പ്രവര്‍ത്തനം ആരംഭിക്കുമെന്നതിനാല്‍ മടക്ക സര്‍വിസുകളും ഇവിടേക്കായിരിക്കും. മഴ മൂലം നെടുമ്പാശ്ശേരി അടച്ചതിനാല്‍ ഹജ്ജിന്റെ അവസാന സര്‍വിസുകള്‍ തിരുവനന്തപുരത്ത് നിന്നാണ് പുറപ്പെട്ടത്.
അടുത്തമാസം 12 മുതല്‍ 26 വരെ 29 വിമാനങ്ങളാണ് മടക്കസര്‍വിസിനായി ക്രമീകരിച്ചിരിക്കുന്നത്. മദീനയില്‍ നിന്നാണ് വിമാനങ്ങള്‍ നെടുമ്പാശ്ശേരിയിലേക്ക് പുറപ്പെടുക. ആദ്യ ദിനത്തില്‍ രണ്ട് വിമാനങ്ങളാണുള്ളത്.
13ന് ഒരു വിമാനവും സര്‍വിസ് നടത്തും. 15, 18, 19, 23 തിയതികളില്‍ മൂന്ന് വിമാനങ്ങളും മദീനയില്‍ നിന്നെത്തും. 16, 22, 25, 26 തിയതികളില്‍ രണ്ട് വിമാനങ്ങളും 17, 21, 24 തിയതികളില്‍ ഓരോ വിമാനവും സര്‍വിസ് നടത്തും.
മടങ്ങിയെത്തുന്ന തീര്‍ഥാടകര്‍ക്ക് അഞ്ച് ലിറ്റര്‍ സംസം വിമാനത്താവളത്തില്‍ വച്ച് കൈമാറും. ഇത് നേരത്തേ തന്നെ സഊദി എയര്‍ലൈന്‍സ് നെടുമ്പാശ്ശേരിയില്‍ എത്തിച്ചിട്ടുണ്ട്. തീര്‍ഥാടകരെ സഹായിക്കാനായി വളണ്ടിയര്‍മാരുടെ സേവനവും ലഭ്യമാക്കും. ഹാജിമാരെ സ്വീകരിക്കുന്നതിനുള്ള ക്രമീകരണങ്ങള്‍ ചര്‍ച്ച ചെയ്യാനാണ് ഇന്ന് യോഗം ചേരുന്നത്.
12,013 പേരാണ് ഈ വര്‍ഷം കേരളത്തില്‍ നിന്ന് ഹജ്ജ് തീര്‍ഥാടനത്തിന് പോയത്. ഇവരില്‍ 277 പേര്‍ ലക്ഷദ്വീപില്‍ നിന്നും 47 പേര്‍ മാഹിയില്‍ നിന്നുള്ളവരുമാണ്. 23 കുട്ടികളും സംഘത്തിലുണ്ട്.