തിരുവനന്തപുരം: സംഘടനകളുമായി ചര്‍ച്ച ചെയ്യാതെ സര്‍വിസ് പെന്‍ഷന്‍കാര്‍ക്ക് ഇന്‍ഷുറന്‍സ് നടപ്പിലാക്കാനുള്ള സംസ്ഥാന സര്‍ക്കാരിന്റെ ഏകപക്ഷീയമായ തീരുമാനം വഞ്ചനാപരമാണെന്ന് കേരള സ്റ്റേറ്റ് സര്‍വിസ് പെന്‍ഷനേഴ്‌സ് അസോസിയേഷന്‍.
ഓപ്ഷന്‍ സൗകര്യം നല്‍കാതെയും ഒ.പി ചികിത്സ ഉറപ്പു വരുത്താതെയുമാണ് പദ്ധതി നടപ്പിലാക്കാന്‍ സര്‍ക്കാര്‍ ശ്രമിക്കുന്നതെങ്കില്‍ പെന്‍ഷന്‍കാരില്‍ നിന്നും ശക്തമായ ചെറുത്തു നില്‍പ് നേരിടേണ്ടി വരുമെന്ന് സംസ്ഥാന പ്രസിഡന്റ് അയത്തില്‍ തങ്കപ്പനും, ജനറല്‍ സെക്രട്ടറി കെ. വിക്രമന്‍ നായരും സംയുക്ത പ്രസ്താവനയില്‍ അറിയിച്ചു.
കേന്ദ്ര പെന്‍ഷന്‍കാര്‍ക്ക് ലഭിക്കുന്ന തോതില്‍ സംസ്ഥാന പെന്‍ഷന്‍കാര്‍ക്ക് മെഡിക്കല്‍ അലവന്‍സ് വര്‍ധിപ്പിക്കാതെ തുച്ഛമായ 300 രൂപയില്‍ നിന്ന് 250 രൂപ വീതം പ്രീമിയമായ പിടിക്കാനുള്ള സര്‍ക്കാര്‍ തീരുമാനം പെന്‍ഷന്‍കാരെ കൂടുതല്‍ സാമ്പത്തിക പ്രതിസന്ധിയിലേക്ക് തള്ളിവിടുമെന്നും അതുകൊണ്ട് ഇക്കാര്യത്തില്‍ സര്‍ക്കാര്‍ പുനര്‍ചിന്തനം നടത്തി ഇന്‍ഷുറന്‍സ് പരിരക്ഷ പൂര്‍ണമായി ലഭിക്കാന്‍ വേണ്ട നടപടി സ്വീകരിക്കണമെന്നും അസോസിയേഷന്‍ ഭാരവാഹികള്‍ ആവശ്യപ്പെട്ടു.