മുള്ളേരിയ: കാറഡുക്ക പഞ്ചായത്തിലെ ശാന്തിനഗര്‍-മാളങ്കൈ പാതയിലെ കരണി പാലത്തിന്റെ പാര്‍ശ്വഭിത്തി തകര്‍ന്നു. ഇതോടെ കരണി പാലത്തിന്റെ നിലനില്‍പ്പ് തന്നെ അപകടത്തിലായി.
ചെര്‍ക്കള ജാല്‍സൂര്‍ സംസ്ഥാന പാതയിലെ ശാന്തിനഗറില്‍നിന്നു കരണി, അരിത്തലം വഴി മാളങ്കൈയില്‍ പൈക്ക- നെല്ലിക്കട്ട റോഡിനെ ബന്ധിപ്പിക്കുന്ന പാലത്തിന്റെ കൈവരികളാണ് ആദ്യം തകര്‍ന്നത്. പിന്നീട് പാലത്തിന്റെ അടിഭാഗം കോണ്‍ക്രീറ്റ് കട്ടകള്‍ അടര്‍ന്നുവീണു അപകടാവസ്ഥയിലായി. ഇപ്പോള്‍ പാര്‍ശ്വഭിത്തിയും തകര്‍ന്ന് വീണതോടെ പാലത്തിന്റെ നിലനില്‍പ്പ് തന്നെ അപകടത്തിലാണ്.
ഇതോടെ ശാന്തിനഗര്‍-കരണി-മാളങ്കൈ റൂട്ടിലെ ഗതാഗതം ഭീതി നിറഞ്ഞതായിട്ടുണ്ട്. ചെങ്കള, മുളിയാര്‍, കാറഡുക്ക എന്നീ മൂന്നു പഞ്ചായത്തുകളെ ബന്ധിപ്പിക്കുന്ന പ്രധാന റോഡായിട്ടും അറ്റപണികള്‍ ചെയ്യാതെ വര്‍ഷങ്ങള്‍ പിന്നിട്ടുവെന്നാണ് പ്രദേശവാസികള്‍ പറയുന്നത്.
റോഡും പാലവും തകര്‍ന്നത് മൂലം കാറഡുക്ക, ചെന്നങ്കോട്, മുള്ളേരിയ, കോട്ടൂര്‍, ബോവിക്കാനം, ഇരിയണ്ണി എന്നി സ്‌കൂളുകളിലേക്ക് പോകുന്ന കുട്ടികളെയും മറ്റു കാല്‍നട, വാഹന യാത്രക്കാരേയും ദുരിതത്തിലാക്കിയിട്ടുണ്ട്. പാലവും റോഡും ഗതാഗത യോഗ്യമാക്കണമെന്നാവശ്യപ്പെട്ട് കരണി മാതൃക സ്വയം സഹായസംഘം അധികൃതര്‍ക്ക് പരാതി നല്‍കിയിരുന്നു. നടപടിയായില്ലെങ്കില്‍ പ്രക്ഷോഭത്തിനിറങ്ങുമെന്ന് നാട്ടുകാര്‍ മുന്നറിയിപ്പ് നല്‍കി.