കോഴിക്കോട്: മിഠായിത്തെരുവ് സൗന്ദര്യവല്‍ക്കരണ പദ്ധതിയുടെ ആദ്യഘട്ട പ്രവര്‍ത്തനങ്ങള്‍ ഇന്നലെ രാത്രിയോടെ ആരംഭിച്ചു. റെയില്‍വേ സ്റ്റേഷന്‍ ജങ്ഷന്‍ മുതല്‍ എസ്.കെ. പൊറ്റക്കാട് പ്രതിമ വരെയുള്ള ഭാഗത്താണ് ആദ്യഘട്ട നവീകരണ പ്രവൃത്തികള്‍ തുടങ്ങിയത്.
വൈദ്യുതി വയറുകള്‍ ഭൂമിക്കടിയില്‍ സ്ഥാപിക്കുന്നതിനുള്ള പ്രവര്‍ത്തനങ്ങള്‍ക്കാണ് ആദ്യം മുന്‍ഗണന നല്‍കുന്നത്. റോഡിന്റെ നടുഭാഗത്ത് പുതിയ വൈദ്യുതിക്കാലുകള്‍ സ്ഥാപിച്ച് നിലവിലെ വൈദ്യുതി കണക്ഷന്‍ താല്‍ക്കാലികമായി അതിലേക്ക് മാറ്റി സ്ഥാപിക്കുകയാണ് ആദ്യ നടപടി.
അതിന്റെ നടപടിക്രമങ്ങള്‍ ഏകദേശം പൂര്‍ത്തിയായി. എന്നാല്‍ മേലെ പാളയം മുതല്‍ കാല്‍ഭാഗത്തോളം പുതിയ കണക്ഷന്‍ ലഭിച്ചിട്ടുണ്ട്.   നിര്‍മാണത്തിന് ആവശ്യമായ സാമഗ്രികള്‍ മിഠായിതെരുവില്‍ എത്തിച്ചുകഴിഞ്ഞു. പദ്ധതിയുമായി സഹകരിക്കാന്‍ വ്യാപാരികള്‍ സന്നദ്ധത പ്രകടിപ്പിച്ചിട്ടുണ്ട്. നോമ്പിന്റെയും പെരുന്നാളിന്റെയും ഭാഗമായി വരുന്ന കച്ചവടം നഷ്ടപ്പെടരുത് എന്നാണ് വ്യാപാരികളുടെ ആവശ്യം. അത് പരിഗണിക്കുമെന്ന് കോര്‍പറേഷന്‍ അധികാരികള്‍ ഉറപ്പ് നല്‍കിയിട്ടുണ്ട്.
മേലേ പാളയം ഭാഗത്ത് മലിനജലം കടന്നുപോകുന്ന കുഴല്‍ ചാലുകള്‍ നിര്‍മിക്കുന്നതിന് തടസമായിരുന്നു. ഇത് പരിഹരിക്കാന്‍ ശ്രമങ്ങള്‍ തുടങ്ങിയിട്ടുണ്ട്.
പദ്ധതിയുമായി ബന്ധപ്പെട്ട ജോലികള്‍ 20 ദിവസത്തിനുള്ളില്‍ പൂര്‍ത്തിയാക്കാന്‍ കഴിയുമെന്നാണ് കരുതുന്നത്.
പദ്ധതിയുടെ ഭാഗമായി  ഡ്രൈയിനേജ് നിര്‍മാണവും ബി.എസ്.എന്‍.എല്‍, ഫയര്‍, കേബിള്‍ വയറുകള്‍ ഭൂമിക്കടിയില്‍ സ്ഥാപിക്കുന്ന പ്രവൃത്തിയും  ആദ്യഘട്ടത്തില്‍ ഉള്‍പ്പെടുത്തിയിട്ടുണ്ട്.
ജില്ലാ ടൂറിസം പ്രമോഷന്‍ കൗണ്‍സിലിന്റെ ആഭിമുഖ്യത്തില്‍ നടത്തുന്ന പദ്ധതിയുടെ പ്രവൃത്തി ഏറ്റെടുത്തിരിക്കുന്നത് ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയാണ്.
പദ്ധതിയുടെ ഭാഗമായുള്ള നിര്‍മാണ പ്രവൃത്തികളെല്ലാം കച്ചവടക്കാര്‍ക്ക് ബുദ്ധിമുട്ടില്ലാത്തവിധം പൂര്‍ത്തീകരിക്കും. 3.64 കോടി രൂപയാണ് പദ്ധതിയ്ക്കായി ചെലവഴിക്കുന്നത്.