കാസര്‍കോട്: നഴ്‌സസ് ദിനത്തോടനുബന്ധിച്ചു നടത്തുന്ന നഴ്‌സസ് വാരാഘോഷം ഇന്ന് കാഞ്ഞങ്ങാട് ഗവ. നഴ്‌സിങ് സ്‌കൂള്‍ പരിസരത്ത് ആരംഭിക്കും. രാവിലെ 10ന് ജില്ലാ മെഡിക്കല്‍ ഓഫിസര്‍ ഡോ. എ.പി ദിനേശ്കുമാര്‍ ഉദ്ഘാടനം ചെയ്യും. ജില്ലാ നഴ്‌സിങ് ഓഫിസര്‍ ടി.വി ഷൈലജ അധ്യക്ഷയാവും.
വാരാഘോഷത്തോടനുബന്ധിച്ച് വിളംബര ജാഥയും സെമിനാറും നടത്തും. എട്ടിനു പരവനടുക്കം അഗതി മന്ദിരം സന്ദര്‍ശിച്ച് അന്തേവാസികള്‍ക്ക് ഉപഹാരം നല്‍കും. 9, 10 തിയതികളില്‍ കാഞ്ഞങ്ങാട് ഗവ. നഴ്‌സിങ് സ്‌കൂളില്‍ കലാമത്സരങ്ങളും 11ന് വിദ്യാനഗര്‍ മുനിസിപ്പല്‍ സ്റ്റേഡിയത്തില്‍ കായിക മത്സരങ്ങളും നടത്തും. 12നു നടക്കുന്ന സമാപന സമ്മേളനം കാഞ്ഞങ്ങാട് നഗരസഭാ ടൗണ്‍ഹാളില്‍ ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ ഉദ്ഘാടനം ചെയ്യും. നഗരസഭാ ചെയര്‍മാന്‍ വി.വി രമേശന്‍ അധ്യക്ഷനാവും. കലക്ടര്‍ കെ. ജീവന്‍ബാബു മുഖ്യാതിഥിയാവും. ചടങ്ങില്‍ സമ്മാനദാനം, വിരമിച്ചവരെ ആദരിക്കല്‍ തുടങ്ങിയവ നടക്കും.