പനമരം: കുടുംബശ്രീ 19-ാം വാര്‍ഷികാഘോഷത്തിന്റെ ഭാഗമായി നടത്തിയ ജില്ലാ തല കായിക മേളയില്‍ 21 പോയിന്റോടെ വെള്ളമുണ്ട സി.ഡി.എസ് ഓവറോള്‍ ചാംപ്യന്‍മാരായി.
അമ്പലവയല്‍, മൂപ്പൈനാട് സി.ഡി.എസുകള്‍ യഥാക്രമം രണ്ട്, മൂന്ന് സ്ഥാനം നേടി. മൂപ്പൈനാട് സി.ഡി.എസിലെ ഹഫ്‌സത്ത് വ്യക്തിഗത ചാംപ്യനായി. 100 മീറ്റര്‍ ഓട്ടമത്സരത്തില്‍ ഒന്നാം സ്ഥാനം നേടി മേളയിലെ വേഗമേറിയ താരമായ ഹഫ്‌സത്ത് 200 മീറ്ററില്‍ ഒന്നും റിലേ മത്സരത്തില്‍ രണ്ടും സ്ഥാനം നേടി.
വടംവലി മത്സരത്തില്‍ അമ്പലവയല്‍, മുള്ളന്‍കൊല്ലി, മീനങ്ങാടി ഒന്നും രണ്ടും മൂന്നും സ്ഥാനം നേടി. പനമരം ഗവ. ഹൈസ്‌കൂളില്‍ നടന്ന മേള ജില്ലാ പഞ്ചായത്ത് വൈസ് പ്രസിഡന്റ് പി.കെ അസ്മത്ത് ഉദ്ഘാടനം ചെയ്തു. പനമരം ഗ്രാമപഞ്ചായത്ത് പ്രസിഡന്റ് ലിസി തോമസ് അധ്യക്ഷയായി.
സ്‌പോര്‍ട്‌സ് കൗണ്‍സില്‍ പ്രസിഡന്റ് എം മധു മുഖ്യപ്രഭാഷണം നടത്തി. കെ.പി വിജയി ടീച്ചര്‍, പനമരം സി.ഡി.എസ് ചെയര്‍പേഴ്‌സണ്‍ രാധാ വേലായുധന്‍, സ്‌പോര്‍ട്‌സ് കൗണ്‍സില്‍ സെക്രട്ടറി സതീഷ് സംസാരിച്ചു. കുടുംബശ്രീ ജില്ലാ മിഷന്‍ കോഡിനേറ്റര്‍ പി സാജിത സ്വാഗതവും അസി. കോഡിനേറ്റര്‍ കെ.പി ജയചന്ദ്രന്‍ നന്ദിയും പറഞ്ഞു.