ന്യൂഡല്‍ഹി: രാജ്യത്തെ ജനങ്ങള്‍ മോദിക്ക് നല്‍കിയ വലിയ പിന്തുണ പുതിയ ഇന്ത്യയുടെ സൃഷ്ടിക്കായിട്ടാണെന്ന് രാഷ്ട്രപതി രാംനാഥ് കോവിന്ദ്. എല്ലാവര്‍ക്കും പുരോഗതിയുണ്ടാകുകയും രാജ്യം സ്വയംപര്യാപ്തതയിലേക്ക് ഉയര്‍ത്തുകയും ചെയ്യുകയെന്നതാണ് പുതിയ സര്‍ക്കാര്‍ ലക്ഷ്യം വയ്‌ക്കേണ്ടതെന്നും അദ്ദേഹം കൂട്ടിച്ചേര്‍ത്തു.

ആഗോളതലത്തില്‍ രാജ്യം വളരേണ്ടതുണ്ട്. രാജ്യത്തു നിന്ന് ദാരിദ്ര്യം പൂര്‍ണമായും തുടച്ചുനീക്കേണ്ടത് അനിവാര്യമാണ്. യുവാക്കളുടെ ശക്തി രാഷ്ട്രപുനര്‍നിര്‍മാണത്തിനായി വിനിയോഗിക്കാനും പുതിയ സര്‍ക്കാരിന് കഴിയണമെന്നും അദ്ദേഹം ആവശ്യപ്പെട്ടു. മോദി സര്‍ക്കാര്‍ അധികാരമേറ്റശേഷം രാഷ്ട്രപതി ഭവനില്‍ നടന്ന ചടങ്ങില്‍ സംസാരിക്കുകയായിരുന്നു രാംനാഥ് കോവിന്ദ്.
മുന്‍കാല പൈതൃകത്തിന്റെ പിന്‍ബലത്തില്‍ ഭാവിയെ കരുപ്പിടിപ്പിക്കാന്‍ രാഷ്ട്രത്തിന് കഴിയേണ്ടതുണ്ടെന്നും രാഷ്ട്രപതി പറഞ്ഞു.