പെരിന്തല്‍മണ്ണ: പ്ലാവിലയില്‍ ഇന്ത്യയുടെ 28 സംസ്ഥാനങ്ങളുടെ പേരുകള്‍ കൊത്തി ഇന്ത്യന്‍ ബുക്ക് ഓഫ് റെക്കോര്‍ഡ്‌സില്‍ ഇടം നേടി ആതിരാ ദാസ്. മേലാറ്റൂര്‍ എടപ്പറ്റ പുല്ലുപറമ്പ് കാപ്പാട്ട് കേദാരത്തിലെ കേശവദാസന്റെയും സവിതയുടെയും മകള്‍ ആതിരാ ദാസ് ലോക്ക് ഡൗണ്‍ കാലത്തെ ആനന്ദകരമാക്കാന്‍ ആരംഭിച്ചതായിരുന്നു ഈ സവിശേഷ കല. 

       ഇന്ത്യന്‍ ബുക്ക് ഓഫ് റെക്കോര്‍ഡ്‌സിനെ ആതിര തന്നെ തന്റെ കഴിവ് വെബ്‌സൈറ്റില്‍ കയറി അറിയിക്കുകയായിരുന്നു. തുടര്‍ന്ന്, അധികൃതര്‍ ഒരാഴ്ച സമയം അനുവദിച്ചു. എന്നാല്‍, അഞ്ച് ദിവസംകൊണ്ട് തന്നെ മുഴുവന്‍ സംസ്ഥാനങ്ങളുടെയും പേരുകള്‍ കൊത്തിയെടുക്കുന്ന വിഡിയോയും ഫോട്ടോയും അയച്ചുകൊടുത്ത് ആതിര താരമായി. ഇതോടെ, പുരസ്‌കാരത്തിനും പരിഗണിക്കുകയായിരുന്നു. ഇരിഞ്ഞാലക്കുട ക്രൈസ്റ്റ് കോളജിലെ രണ്ടാംവര്‍ഷ എം.എ ഇംഗ്ലീഷ് വിദ്യാര്‍ഥിനിയാണ്. 

      ബോട്ടില്‍ ആര്‍ട്ട്, മ്യൂറല്‍ പെയിന്റിങ്, സ്റ്റന്‍സില്‍ ആര്‍ട്ട്, പോര്‍ട്രേറ്റ് ഡ്രോയിങ് തുടങ്ങിയവയാണ് ആതിരയുടെ മറ്റു ഇഷ്ട വിനോദങ്ങള്‍. അച്ഛന്‍ കേശവദാസ് വിശാഖപട്ടണത്ത് എച്ച്.ആന്റ് എല്‍ ഉദ്യോഗസ്ഥനാണ്. അമ്മ സവിത വെള്ളിയഞ്ചേരിയില്‍ പ്രീ പ്രൈമറി അധ്യാപികയും അനുജന്‍ അഖില്‍ദാസ് പത്താം ക്ലാസ് വിദ്യാര്‍ഥിയുമാണ്. ദിവസങ്ങള്‍ക്ക് മുന്‍പ് ഇന്ത്യന്‍ ബുക്ക് ഓഫ് റെക്കോര്‍ഡ്‌സില്‍ നിന്നും മെഡലും സര്‍ട്ടിഫിക്കറ്റും അനുമോദന പത്രവും കൊറിയര്‍ വഴി ലഭിച്ചതായി ആതിര പറഞ്ഞു.