മലപ്പുറം: മലപ്പുറം-മഞ്ചേരി റൂട്ടില്‍ സ്വകാര്യ ബസുകള്‍ പണിമുടക്കിയതിനെത്തുടര്‍ന്ന് യാത്രക്കാര്‍ പെരുവഴിയിലായി. ബസ് യാത്രക്കാരിയുടെ പരാതിയെത്തുടര്‍ന്ന് ബസ് ജീവനക്കാരനെ പൊലിസ് മര്‍ദിച്ചെന്നാരോപിച്ചാണ് മലപ്പുറം-മഞ്ചേരി റൂട്ടില്‍ സ്വകാര്യ ബസ് മിന്നല്‍ പണിമുടക്കു നടത്തിയത്. ഇന്നലെ ഉച്ചയോടെയായിരുന്നു സംഭവം. ബസ് സര്‍വീസുകള്‍ നിലച്ചതോടെ യാത്രക്കാര്‍ പാതിവഴിയില്‍ കുടുങ്ങി. സ്‌കൂള്‍ വിദ്യാര്‍ഥികളും സമരം മൂലം വീട്ടിലെത്താനാകാതെ കുടുങ്ങി.
തിരൂര്‍-മഞ്ചേരി റൂട്ടിലോടുന്ന ഷമ്മാസ് ബസിലെ ജീവനക്കാരനെ പൊലിസ് മര്‍ദിച്ചെന്നാണു തൊഴിലാളികളുടെ ആരോപണം. കോട്ടക്കല്‍ എടരിക്കോട് നിന്നും ഈ ബസില്‍ കയറിയ യാത്രക്കാരിയുടെ പരാതിയെത്തുടര്‍ന്നാണ് സംഭവം. എടരിക്കോട് നിന്നും പിതാവിനൊപ്പം ബസില്‍ കയറിയ യാത്രക്കാരി ബസില്‍ കയറുന്നതിനു മുന്‍പ് ബസ് മുന്നോട്ടെടുത്തെന്നും ഇതു ചോദിച്ചതിനെത്തുടര്‍ന്ന് ജീവനക്കാരന്‍ അപമര്യാദയായി പെരുമാറിയെന്നും യാത്രക്കാരി പൊലിസില്‍ പരാതി നല്‍കുകയായിരുന്നു. മലപ്പുറം പൊലിസില്‍ വിവരം ലഭിച്ചതിനെത്തുടര്‍ന്ന് മലപ്പുറത്തു നിന്നും ബസ് കസ്റ്റഡിയിലെടുത്തു. തുടര്‍ന്ന് ബസ് ജീവനക്കാരനെ പൊലിസ് മര്‍ദിച്ചുവെന്നാരോപിച്ചാണ് ബസുകള്‍മ മിന്നല്‍ പണിമുടക്ക് നടത്തിയത്. സംഭവം പൊലീസ് നിഷേധിച്ചെങ്കിലും ജീവനക്കാര്‍ നിലപാടില്‍ ഉറച്ചു നില്‍ക്കുകയായിരുന്നു. സംഭവം അറിഞ്ഞയുടന്‍ ഈ റൂട്ടിലോടുന്ന ബസ്ജീവനക്കാര്‍ സംഘടിതമായി ബസുകള്‍ തടഞ്ഞിട്ടു. ഇതോടെ തിരൂര്‍ മഞ്ചേരി റൂട്ടിലെ യാത്രക്കാര്‍ പ്രതിസന്ധിയിലായി. തിരൂര്‍, കോട്ടയ്ക്കല്‍, മഞ്ചേരി സ്റ്റാന്‍ഡുകളിലും മലപ്പുറം ഉള്‍പ്പെടെയുള്ള വിവിധ സ്‌റ്റോപ്പുകളിലും സ്‌കൂള്‍ വിദ്യാര്‍ഥികള്‍ ഉള്‍പ്പെടെ നൂറുകണക്കിനു യാത്രക്കാര്‍ കുടുങ്ങിക്കിടന്നു. രാത്രി വൈകിയും വീട്ടിലെത്താനാവാതെ യാത്രക്കാര്‍ വലഞ്ഞു. എന്നാല്‍ കെ.എസ്.ആര്‍.ടി.സി അധിക സര്‍വീസ് നടത്തിയതും പൊലിസ് വാഹനങ്ങളില്‍ വിദ്യാര്‍ഥികളെ കൊണ്ടുപോയതും ആശ്വാസമായി. മലപ്പുറം സി.ഐയുമായി നടത്തിയ ചര്‍ച്ചയില്‍ സമരം പിന്‍വലി്കകാന്‍ തീരുമാനിച്ചു.