കൊണ്ടോട്ടി: ജില്ലയില്‍ ഡിഫ്തീരിയ, കോളറ തുടങ്ങിയ മാരക രോഗങ്ങള്‍ പടരുന്ന സാഹചര്യത്തില്‍ ആരോഗ്യവകുപ്പ് ജീവനക്കാരുടെ കുറവ് നികത്തണമെന്ന് ആവശ്യപ്പെട്ട് കേരള എന്‍.ജി.ഒ അസോസിയേഷന്‍ ജില്ലാ കമ്മിറ്റി ആരോഗ്യമന്ത്രി കെ.കെ ശൈലജ ടീച്ചര്‍ക്ക് നിവേദനം നല്‍കി. ജൂനിയര്‍ പബ്ലിക് ഹെല്‍ത്ത് നഴ്‌സുമാര്‍ അയ്യായിരം പേര്‍ക്ക് ഒരാള്‍ എന്ന നിലയിലാണെങ്കില്‍ ജില്ലയില്‍ അത് പതിനയ്യായിരം മുതല്‍ 20,000 വരെയുള്ളവര്‍ക്ക് ഒരാള്‍ എന്ന നിലയിലാണ്. ജൂനിയര്‍ ഹെല്‍ത്ത് ഇന്‍സ്‌പെക്ടര്‍ തസ്തികയും ഇതുപോലെയാണ്. പഞ്ചായത്ത് വിഭജനം നടന്ന ശേഷവും അതിനുമുന്‍പും മിക്ക പഞ്ചായത്തിലും ഹെല്‍ത്ത് ഇന്‍സ്‌പെക്ടര്‍മാരില്ല. ജില്ലയിലെ പ്രത്യേക സാഹചര്യം കണക്കിലെടുത്ത് ജനസംഖ്യാനുപാതമായി ജെ.പി.എച്ച്.എന്‍, പി.എച്ച്.എന്‍, ജെ.എച്ച്.ഐ, എച്ച്.ഐ മാരുടെ എണ്ണം വര്‍ധിപ്പിക്കണമെന്ന് എന്‍.ജി.ഒ അസോസിയേഷന്‍ കമ്മിറ്റി ആവശ്യപ്പെട്ടു.