പടിഞ്ഞാറങ്ങാടി: പറക്കുളത്ത് പ്രവര്‍ത്തിക്കുന്ന കപ്പൂര്‍ പ്രാഥമികാരോഗ്യ കേന്ദ്രത്തില്‍ കിടത്തി ചികിത്സാ സൗകര്യമൊരുക്കണമെന്ന ആവശ്യം ശക്തമാകുന്നു. ഇരുനൂറോളം കുട്ടികള്‍ താമസിച്ച് പഠിക്കുന്ന പറക്കുളം മോഡല്‍ റസിഡന്‍ഷ്യല്‍ സ്‌കൂളും ഒട്ടേറെ തൊഴിലാളികള്‍ പണിയെടുക്കുന്ന വ്യവസായപാര്‍ക്കും വരാനിരിക്കുന്ന എന്‍.എസ്.എസ് കോളജ് ഉള്‍പടെയുള്ള സ്ഥാപനങ്ങളുമുള്ള പ്രദേശത്ത് അടിയന്തിര ചികിത്സ ലഭിക്കാനായി പ്രദേശവാസികള്‍ 15 കിലോമീറ്ററിലധികം യാത്ര ചെയ്യേണ്ട അവസ്ഥയാണിപ്പോള്‍.
വിദ്യാര്‍ഥികള്‍ ഉള്‍പടെയുളള പ്രദേശവാസികള്‍ നേരിടുന്ന ഭുദ്ധിമുട്ടുകള്‍ കണക്കിലെടുത്ത് പറക്കുളം പ്രാഥമികാരോഗ്യ കേന്ദ്രത്തില്‍ കിടത്തി ചികിത്സാ സൗകര്യമൊരുക്കാനും കൂടുതല്‍ ഡോക്ടര്‍മാരെ നിയമിക്കാനും നടപടി സ്വീകരിക്കണമെന്നാവശ്യപ്പെട്ട് ജി.എം.ആര്‍.എസ് പി.ടി.എ ഭാരവാഹിയും, പൊതുപ്രവര്‍ത്തകനുമായ സുന്ദരന്‍ മുണ്ട്രക്കോട് വകുപ്പ് മന്ത്രിക്ക് നിവേദനം നല്‍കി.