മനാമ: ശമ്പളം മുടങ്ങിയതിനെ തുടര്‍ന്ന് ബഹ്‌റൈനിലെ പ്രവാസികള്‍ തൊഴില്‍മന്ത്രാലയത്തിലേക്ക് മാര്‍ച്ച് നടത്തിയ സംഭവത്തില്‍ പരിഹാരമായി.
ബഹ്‌റൈന്‍ തൊഴില്‍ സാമൂഹിക വികസനമന്ത്രി ജുമൈല്‍ ബിന്‍ മുഹമ്മദ് അലി ഹുമൈദാന്റെ ഇടപെടല്‍ മൂലമാണ് ആയിരക്കണക്കിനു തൊഴിലാളികളുടെ പ്രശ്‌നങ്ങള്‍ക്ക് ഒരാഴ്ചയ്ക്കുള്ളില്‍ പരിഹാരമായത്.

ബഹ്‌റൈനിലെ മആമീറിലുള്ള പ്രമുഖ കോണ്‍ട്രാക്ടിങ് കമ്പനിയില്‍ നിന്നു രണ്ടു മാസമായി തങ്ങള്‍ക്ക് ശമ്പളം ലഭിക്കുന്നില്ലെന്ന പരാതിയുമായാണ് 2,000ത്തോളം പ്രവാസി തൊഴിലാളികള്‍ ബഹ്‌റൈനിലെ തൊഴില്‍മന്ത്രാലയ ആസ്ഥാനത്തേക്കു കഴിഞ്ഞ ആഴ്ച മാര്‍ച്ച് നടത്തിയത്.
തൊഴിലാളികളെ തൊഴില്‍മന്ത്രാലയ പ്രതിനിധികളെത്തിയാണു സത്വര നടപടി ഉറപ്പുനല്‍കി തിരിച്ചയച്ചത്.
സംഭവം മാധ്യമങ്ങളില്‍ വാര്‍ത്തയായതിനെ തുടര്‍ന്നാണ് പ്രശ്‌നത്തില്‍ മന്ത്രി ഇടപെട്ടത്. കമ്പനി അധികൃതരുമായുള്ള കൂടിക്കാഴ്ചയില്‍ ഒരാഴ്ചക്കുള്ളില്‍ പ്രശ്‌ന പരിഹാരം ഉണ്ടാകുമെന്നു ബന്ധപ്പെട്ടവര്‍ ഉറപ്പുനല്‍കുകയും ചെയ്തിരുന്നു.

എന്നാല്‍ ഈ ഉറപ്പുകള്‍ കമ്പനി പാലിക്കുന്നുണ്ടോ എന്നു നിരീക്ഷിക്കാന്‍ അധികൃതരെ മന്ത്രി നിയോഗിക്കുകയും ചെയ്തതോടെയാണു പരിഹാരമുണ്ടായത്.
45 ദിവസത്തെ ശമ്പളം മാത്രമാണ് മുടങ്ങിയതെന്നും അവ പൂര്‍ണമായും നല്‍കിയതായും അധികൃതര്‍ മന്ത്രിയെ ധരിപ്പിച്ചു.
ശമ്പളം കുടിശ്ശിക വരാതെ തൊഴിലാളികള്‍ക്ക് കൃത്യമായി നല്‍കാന്‍ ശ്രമിക്കണമെന്ന് മന്ത്രി നിര്‍ദേശിച്ചു.