കൊച്ചി: കേരളാ ബ്ലാസ്റ്റേഴ്‌സിനായുള്ള അനസ് എടത്തൊടികയുടെ അരങ്ങേറ്റം വൈകും. താരത്തിന് മൂന്ന് മത്സരങ്ങളില്‍ വിലക്ക് വന്നതോടെയാണ് അരങ്ങേറ്റ മത്സരത്തിനായുള്ള കാത്തിരിപ്പ് നീളുന്നത്. ബ്ലാസ്റ്റേഴ്‌സിന്റെ ആദ്യത്തെ മൂന്ന് മത്സരങ്ങളിലും അനസിന് കളിക്കാനാവില്ല. കൊല്‍ക്കത്ത, മുംബൈ സിറ്റി എഫ്.സി, ഡല്‍ഹി ഡൈനാമോസ് എന്നീ ടീമുകള്‍ക്കെതിരേയുള്ള കളികളാണ് അനസിന് നഷ്ടമാവുക.കഴിഞ്ഞ സീസണില്‍ ജംഷഡ്പൂര്‍ താരമായിരുന്ന അനസ് ഈ സീസണിലാണ് ബ്ലാസ്‌റ്റേഴ്‌സിനൊപ്പം ചേര്‍ന്നത്. ഈ വര്‍ഷം ഏപ്രിലിലാണ് താരത്തിന് വിലക്കേര്‍പ്പെടുത്തിയത്. ഇന്ത്യന്‍ സൂപ്പര്‍ കപ്പില്‍ എഫ്.സി ഗോവക്കെതിരേയുള്ള മത്സരത്തില്‍ പകുതി സമയത്ത് ടണലില്‍വച്ച് എതിര്‍ ടീം താരങ്ങളുമായി ഏറ്റുമുട്ടിയതിനെ തുടര്‍ന്നാണ് താരത്തെ മൂന്ന് കളികളില്‍ നിന്ന് വിലക്കിയത്. 5-0 ത്തിന് പരാജയപ്പെട്ടതോടെയാണ് താരങ്ങള്‍ പരസ്പരം ഏറ്റുമുട്ടിയത്. മത്സരത്തില്‍ തോറ്റതിനാല്‍ ജംഷഡ്പുര്‍ എഫ്.സി ടൂര്‍ണമെന്റില്‍ നിന്ന് പുറത്തായിരുന്നു. ഈ വിലക്കാണ് പുതിയ സീസണിലേക്ക് നീണ്ടത്. പുതിയ സീസണില്‍ ജിങ്കനൊപ്പം മികച്ച കൂട്ടുകെട്ടായിട്ടായിരുന്നു ബ്ലാസ്റ്റേഴ്‌സ് ആരാധകര്‍ കാത്തിരുന്നിരുന്നത്. എന്നാല്‍ ആദ്യ മൂന്ന് കളിയില്‍ അനസിന് പകരക്കാരനെ കണ്ടത്തേണ്ടി വരും. കഴിഞ്ഞ സീസണില്‍ പരുക്ക് കാരണം കൂടുതല്‍ മത്സരം കളിക്കാനും താരത്തിനായിട്ടില്ല. എട്ടു മത്സരങ്ങളില്‍ മാത്രമാണ് അനസ് കളിച്ചിട്ടുള്ളത്. പുതിയ സീസണില്‍ ബ്ലാസ്റ്റേഴ്‌സിനായി അനസ് കളത്തിലിറങ്ങുന്നത് കാണാന്‍ കാത്തിരിക്കുകയാണ് മലയാളി ആരാധകര്‍.