തിരൂരങ്ങാടി: രാജ്യത്ത് മുസ്‌ലിംകള്‍ നേരിടുന്ന വെല്ലുവിളികളെ അതിജീവിക്കാനും സമുദായം നേരിടുന്ന പ്രതിസന്ധികളെ തരണം ചെയ്യുന്നതിനും മുസ്‌ലിം സംഘടനകള്‍ ഒന്നിച്ച് നില്‍ക്കണമെന്ന് കേരള വഖഫ് ബോര്‍ഡ് ചെയര്‍മാന്‍ സയ്യിദ് റഷീദലി ശിഹാബ് തങ്ങള്‍.
മമ്പുറം ആണ്ടുനേര്‍ച്ചയോടനുബന്ധിച്ച് നടക്കുന്ന മതപ്രഭാഷണ പരമ്പരയുടെ അവസാനദിന പരിപാടി ഉദ്ഘാടനം ചെയ്ത് സംസാരിക്കുകയായിരുന്നു തങ്ങള്‍. ആശയ പരമായി ഒന്നിക്കാന്‍ സാധിക്കണമെന്നില്ല. പക്ഷേ ഒരേ മതാനുയായികള്‍ എന്ന നിലയില്‍ ഒന്നിക്കാന്‍ കഴിയണമെന്നും തങ്ങള്‍ പറഞ്ഞു . കെ.സി മുഹമ്മദ് ബാഖവി അധ്യക്ഷനായി. അന്‍വര്‍ മുഹ് യിദ്ദീന്‍ ഹുദവി ആലുവ മുഖ്യ പ്രഭാഷണം നടത്തി.
ചെമ്മുക്കന്‍ കുഞ്ഞാപ്പു ഹാജി, കെ.എം സൈദലവി ഹാജി കോട്ടക്കല്‍, കാളാവ് സൈദലവി മുസ്‌ലിയാര്‍, യു.ശാഫി ഹാജി ചെമ്മാട്, യൂസുഫ് ഫൈസി മേല്‍മുറി, ശംസുദ്ദീന്‍ ഹാജി വെളിമുക്ക്, അബ്ദുല്‍ഖാദിര്‍ ഫൈസി അരിപ്ര, സി.കെ മുഹമ്മദ് ഹാജി, വി. ജഅ്ഫര്‍ ഹുദവി ഇന്ത്യനൂര്‍, പി.കെ നാസ്വിര്‍ ഹുദവി കൈപ്പുറം തുടങ്ങിയവര്‍ സംബന്ധിച്ചു. ഇന്ന് രാത്രി ദിക്‌റ് ദുആ സദസും ഹിഫ്‌ള് സനദ് ദാനവും നടക്കും. സയ്യിദ് ബശീറലി ശിഹാബ് തങ്ങള്‍ ഉദ്ഘാടനം ചെയ്യും.
കോഴിക്കോട വലിയ ഖാസി സയ്യിദ് അബ്ദുന്നാസ്വിര്‍ ഹയ്യ് ശിഹാബ് തങ്ങള്‍ പ്രാരംഭ പ്രാര്‍ഥന നടത്തും. ദാറുല്‍ഹുദാ വി.സി ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനാകും. പ്രാര്‍ഥനാ സദസിന് വാവാട് കുഞ്ഞിക്കോയ മുസ്‌ലിയാര്‍ നേതൃത്വം നല്‍കും.ഖുര്‍ആന്‍ മനഃപാഠമാക്കിയ 34 വിദ്യാര്‍ഥികള്‍ക്കുള്ള സര്‍ട്ടിഫിക്കറ്റ് വിതരണം സമസ്ത ജന. സെക്രട്ടറി കെ. ആലിക്കുട്ടി മുസ്‌ലിയാര്‍ നിര്‍വഹിക്കും. ആണ്ടുനേര്‍ച്ച 18ന് സമാപിക്കും.