കാസര്‍കോട്: റഹ്മാനിയ നഗര്‍ സ്വദേശിയുടെ മുഖത്ത് മുളകുപൊടി വിതറി മൊബൈല്‍ ഫോണ്‍ തട്ടിയെടുത്ത കേസില്‍ രണ്ടു പേര്‍ അറസ്റ്റില്‍. മുട്ടത്തൊടി എരിയപ്പാടിയിലെ റഫീഖ് (22), ആലംപാടിയിലെ സലാം(26) എന്നിവരാണ് അറസ്റ്റിലായത്. 14നു വൈകുന്നേരം ഏഴിനു എര്‍മ്മാളം പള്ളിക്കു സമീപത്തെ ചെറിയ പാലത്തിനു മുകളില്‍ വച്ചായിരുന്നു കേസിനാസ്പദമായ സംഭവം. വീടിനു സമീപം ഇറക്കാമെന്ന് പറഞ്ഞ് ഓട്ടോയില്‍ കയറ്റിക്കൊണ്ടു പോവുകയും വഴിയില്‍ വച്ച് മുഖത്ത് മുളകു പൊടി വിതറിയ ശേഷം കൈയിലുണ്ടായിരുന്ന മൊബൈല്‍ ഫോണ്‍ തട്ടിപ്പറിച്ചെന്നുമാണ് പരാതി.