മൊകേരി: മൊകേരി ഗവ. കോളജില്‍ ഈ വര്‍ഷം നവംബര്‍ ആദ്യം നടക്കാനിരിക്കുന്ന നാക് റീ അക്രഡിറ്റേഷന്‍ പ്രവര്‍ത്തനങ്ങള്‍ക്ക് തുടക്കമായി. മൊകേരി ഗവണ്‍മെന്റ് കോളജ് സെമിനാര്‍ ഹാളില്‍ വച്ച് തിങ്കളാഴ്ച നടന്ന ജനപ്രതിനിധികളുടെയും രാഷ്ട്രീയ പാര്‍ട്ടി പ്രതിനിധികളുടെയും യോഗം കോളജിന്റെ വികസന പ്രവര്‍ത്തനങ്ങള്‍ക്കായി വിവിധ പദ്ധതികള്‍ക്ക് രൂപം നല്‍കി.  പാറക്കല്‍ അബ്ദുല്ല എം.എല്‍.എ യോഗം ഉദ്ഘാടനം ചെയ്തു.
കോളജിന്റെ അടിസ്ഥാന സൗകര്യ വികസനത്തിനും പുതിയ കോഴ്‌സുകള്‍ അനുവദിപ്പിക്കുന്നതിനും ജനകീയ കൂട്ടായ്മ ഉയര്‍ന്നുവരേണ്ടതുണ്ടെന്ന് എം.എല്‍.എ അഭിപ്രായപ്പെട്ടു. കോളജിലെ നാക് റീ അക്രഡിറ്റേഷന്‍ പ്രവര്‍ത്തനങ്ങള്‍ക്ക് ഏകോപിപ്പിക്കുന്നതിനായി കോളജ് വികസന കമ്മിറ്റിക്ക് യോഗം രൂപം നല്‍കി. കോളജ് പ്രിന്‍സിപ്പല്‍ ഡോ യൂസഫ് എ.കെ അധ്യക്ഷനായ യോഗത്തില്‍ മുന്‍ എം.എല്‍.എ കെ.കെ ലതിക, ഡോ അരുണ്‍ലാല്‍ കെ, പ്രൊഫ. അഷ്‌റഫ് കൊയിലോത്താം കണ്ടിയില്‍, മോഹന്‍ എന്‍ സംസാരിച്ചു.