കോഴിക്കോട്: സംസ്ഥാനത്തെ മെഡിക്കല്‍ കോളജ് കലാമത്സരങ്ങള്‍ നാലുദിനം പിന്നിടുമ്പോള്‍ കോഴിക്കോട് 200 പോയിന്റുമായി മുന്നില്‍. 106 പോയിന്റുമായി ആലപ്പുഴ മെഡിക്കല്‍ കോളജ് രണ്ടാംസ്ഥാനത്തും, 78 പോയിന്റുമായി തൃശൂര്‍ മെഡിക്കല്‍ കോളജ് മൂന്നാം സ്ഥാനത്തുമുണ്ട്.
കലോത്സവത്തിന്റെ ഉദ്ഘാടനം ചലചിത്രസംവിധായകന്‍ രഞ്ജിത്ത് നിര്‍വഹിച്ചു. അപ്പീല്‍ വകുപ്പ് സംഘാടക സമിതിയാണ് കൈകാര്യം ചെയ്യുന്നുവെന്ന പരാതികളും ഉയരുന്നുണ്ട്.
 എസ്.എഫ്.ഐ യൂണിയന്‍ നിലവിലുള്ള തിരുവന്തപുരം, കോട്ടയം, മെഡിക്കല്‍ കോളജുകളോട് സംഘാടക സമിതി അവഗണന കാണിക്കുന്നുവെന്ന് തിരുവന്തപുരം മെഡിക്കല്‍ കോളജ് യൂണിയന്‍ സെക്രട്ടറി ഹരികൃഷ്ണന്‍ പരാതിപ്പെട്ടു.
250 രൂപ രജിസ്‌ട്രേഷന്‍ തുക വാങ്ങി താമസത്തിനായി കൂടുതല്‍ തുക വാങ്ങുന്നുവെന്നും താമസിക്കുന്നിടത്ത് ആവശ്യമായ വെള്ളമോ ഫാനോ ഇല്ലെന്നും പരാതിയുണ്ട്.
എല്ലാ ഇനങ്ങളുടെ ഫലപ്രഖ്യാപനത്തിലും കോഴിക്കോട് മെഡിക്കല്‍ കോളജിനെ ഉള്‍പ്പെടുത്തുന്നുണ്ടെന്നും പരാതിപ്പെട്ടാല്‍ മറ്റുവിധത്തില്‍ പ്രതികാരം വീട്ടുന്നുവെന്നുമാണ് പരാതി.
എന്നാല്‍ ഇതുവരെ നടത്തിപ്പുമായി ബന്ധപ്പെട്ട് യാതൊരു പരാതിയും തങ്ങള്‍ക്ക് ലഭിച്ചിട്ടില്ലെന്നും ആവശ്യമായ എല്ലാ സൗകര്യങ്ങളും നല്‍കിയിട്ടുണ്ടെന്നും യൂണിയന്‍ ഭാരവാഹികള്‍ പറഞ്ഞു. ഇന്ന് മൂന്നുവേദികളിലായി ഒപ്പന (ആണ്‍, പെണ്‍), നൊസ്റ്റാള്‍ജിയ, ഫാഷന്‍ഷോ, മാര്‍ഗംകളി, മറ്റിനങ്ങളും അരങ്ങേറും.