റിയാദ്: ഇന്ത്യന്‍ കോണ്‍സുലേറ്റ് പുതിയ ഹജ്ജ് കോണ്‍സുലായി മണിപ്പൂര്‍ സ്വദേശിയായ യുംഖൈബാം സാബിര്‍ ചുമതലയേറ്റു. ഹജ്ജ് കോണ്‍സുലായിരുന്ന മുഹമ്മദ് ഷാഹിദ് ആലം ഡല്‍ഹി വിദേശ കാര്യ മന്ത്രാലയത്തിലേക്ക് മാറിയ ഒഴിവിലേക്കാണ് യുംഖൈബാം സാബിര്‍ നിയമിതനായത്.

ഈജിപ്ത്, ഒമാന്‍ എന്നീ രാജ്യങ്ങളിലെ ഇന്ത്യന്‍ എംബസികളില്‍ സേവനമനുഷ്ഠിച്ച യുംഖൈബാം സാബിര്‍ ഇന്ത്യന്‍ ഫോറിന്‍ സര്‍വിസിലെ 2012 ബാച്ചുകാരനാണ്. ഡല്‍ഹിയില്‍ വിദേശകാര്യ മന്ത്രാലയത്തില്‍നിന്നാണ് ജിദ്ദയിലേക്ക് വരുന്നത്.
കൈറോയിലെ അമേരിക്കന്‍ യൂനിവേഴ്‌സിറ്റിയില്‍ അറബിഭാഷാ പഠനം പൂര്‍ത്തിയാക്കിയ യുംഖൈബാം സാബിര്‍ പൊളിറ്റിക്കല്‍ സയന്‍സില്‍ ഡല്‍ഹി യൂനിവേഴ്‌സിറ്റിയില്‍നിന്ന് ബിരുദവും ജവഹര്‍ലാല്‍ നെഹ്‌റു യൂനിവേഴ്‌സിറ്റിയില്‍ നിന്ന് മാസ്റ്റര്‍ ബിരുദവും നേടിയിട്ടുണ്ട്. ഇംഫാല്‍ ജില്ലയിലെ റിട്ട. അധ്യാപകന്‍ മുഹമ്മദ് ത്വയ്യിബ് അലിയുടെയും ഷാഹിദയുടെയും മകനാണ്.