ജിദ്ദ: സഊദിയിലെ ദമ്മാമില്‍ നിന്നും ഇന്‍ഡിഗോ എയര്‍ലൈന്‍സ് പ്രഖ്യാപിച്ച സര്‍വിസുകള്‍ റദ്ദാക്കിയതായി പരാതി. ജൂലൈ അഞ്ചു മുതല്‍ ദമ്മാമില്‍ നിന്നും മുംബയിലേക്ക് ഷെഡ്യൂള്‍ ചെയ്ത സര്‍വിസുകളാണ് യാതൊരു മുന്നറിയിപ്പുമില്ലാതെ റദ്ദാക്കിയിരിക്കുന്നത്. ഇതോടെ അവധിക്ക് നാട്ടില്‍ പോവാന്‍ ടിക്കറ്റെടുത്ത കുടുംബങ്ങള്‍ പലരും കുടുങ്ങിയിരിക്കുകയാണ്.
ജൂണ്‍ ഒന്‍പതിനാണ് ഇന്‍ഡിഗോ എയര്‍ ഈ സര്‍വിസ് ആദ്യം പ്രഖ്യാപിക്കുന്നത്. എയര്‍ലൈന്‍ കമ്പനിയുടെ സോഷ്യല്‍ നെറ്റ് വര്‍ക്ക് പേജുകള്‍ വഴിയും വെബ്‌സൈറ്റിലൂടെയുമായിരുന്നു പ്രഖ്യാപനം. മറ്റു കമ്പനികളെ അപേക്ഷിച്ച് ടിക്കറ്റ് വില കുറവായതിനാല്‍ മലയാളികള്‍ ഉള്‍പ്പെടെ പലരും മുംബൈ വഴി കേരളത്തിലേക്ക് ടിക്കറ്റുകള്‍ ബുക്ക് ചെയ്തു.
എന്നാല്‍ കഴിഞ്ഞ ദിവസം മുതലാണ് എയര്‍ലൈന്‍ വെബ്‌സൈറ്റില്‍ നിന്ന് ഓഗസ്ത് ആദ്യവാരം വരെയുള്ള സര്‍വിസുകള്‍ ഒഴിവാക്കിയതായി കാണിക്കുന്നത്. എന്നാല്‍ ടിക്കറ്റെടുത്ത ആര്‍ക്കും ഇതുവരെ ഔദ്യോഗികമായി അറിയിപ്പൊന്നും ലഭിച്ചിട്ടില്ല. ഇതോടെ സ്‌കൂള്‍ അവധിയും കമ്പനികളില്‍ നിന്ന് വാര്‍ഷിക അവധിയും തരപ്പെടുത്തി നാട്ടിലെത്താന്‍ ടിക്കറ്റെടുത്ത പലരും ഇനി ഉയര്‍ന്ന നിരക്ക് നല്‍കി മറ്റു വിമാന കമ്പനികളെ ആശ്രയിക്കേണ്ട അവസ്ഥയിലാണ്.