ഗുവാഹതി: ബി.ജെ.പി ഭരിക്കുന്ന അസമില്‍ സി.എ.എ സമരത്തിന് ജയിലിലടയ്ക്കപ്പെട്ട വിദ്യാര്‍ഥി നേതാവിന്റെ ചിത്രം വരച്ചതിന് നാല് കലാകാരന്മാരെയും ഒരു വിദ്യാര്‍ഥി നേതാവിനെയും പൊലിസ് അറസ്റ്റ് ചെയ്തു. നാലു മണിക്കൂറിനു ശേഷം വിട്ടയച്ച ഇവരെക്കൊണ്ട് ഗുവാഹതി ദേശീയ പാതയോരത്ത് വരച്ച ചിത്രം പൊലിസ് മായ്പിച്ചതായും ദ ടെലഗ്രാഫ് റിപ്പോര്‍ട്ട് ചെയ്തു.

അസമില്‍ ഒരു വര്‍ഷത്തോളമായി ജയിലില്‍ കഴിയുന്ന, സി.എ.എ വിരുദ്ധ സമരത്തിന് നേതൃത്വം നല്‍കിയ അഖില്‍ ഗൊഗൊയ് എന്ന വിദ്യാര്‍ഥി നേതാവിന്റെ ചിത്രമാണ് പൊലിസ് മായ്പ്പിച്ചത്. അംഗ ആര്‍ട്ട് കലക്റ്റിവ് എന്ന ചിത്രകാരന്മാരുടെ കൂട്ടായ്മയായിരുന്നു ചിത്രം വരച്ചത്. 2019 ഡിസംബറിലാണ് അഖില്‍ അറസ്റ്റിലായത്.

അനീതിക്കെതിരേയുള്ള ചെറുത്തുനില്‍പ്പിന്റെ പ്രതീകം എന്ന നിലയ്ക്കാണ് അഖിലിന്റെ ചിത്രം വരച്ചതെന്ന് ചിത്രകാരനും ഡല്‍ഹി കോളജ് ഒഫ് ആര്‍ട്‌സിലെ അധ്യാപകനുമായ ദ്രുപജിത് ശര്‍മ പറഞ്ഞു. പൊലിസുകാരുടെ സാന്നിധ്യത്തിലാണ് തങ്ങളെക്കൊണ്ട് ചിത്രം മായ്പിത്. ചിത്രം വരയ്ക്കാന്‍ ആറു മണിക്കൂര്‍ എടുത്തെങ്കില്‍, മായ്ച്ചുകളയാന്‍ അഞ്ചു മിനിറ്റേ വേണ്ടിവന്നുള്ളു. പൊതുസ്ഥലത്ത് ചിത്രം വരയ്ക്കണമെങ്കില്‍ മുന്‍കൂര്‍ അനുമതി വാങ്ങണമെന്ന് പറഞ്ഞാണ് പൊലിസ് ബുധനാഴ്ച തങ്ങളെ അറസ്റ്റ് ചെയ്തതെന്നും ശര്‍മ്മ പറഞ്ഞു.

അസം പൊലിസിന്റെ നടപടി ജനാധിപത്യത്തിന് ഗുരണകരമല്ലെന്ന് ക്രിഷക് മുക്തി സംഗ്രാം സമിതി(കെ.എം.എസ്.എസ്) ഉം അതിന്റെ വിദ്യാര്‍ഥി വിഭാഗം സാത്ര മുക്തി സംഗ്രാം സമിതി(എസ്.എം.എസ്.എസ്) എന്നിവ അറിയിച്ചു. അറസ്റ്റിലായ നേതാക്കളുടെ ചിത്രം പൊതു സ്ഥലത്ത് വരയ്ക്കരുതെന്ന് പൊലിസ് അറിയിച്ചതായും അറസ്റ്റിലായ എസ്.എം.എസ്.എസ് ജനറല്‍സെക്രട്ടറി പ്രഞ്ജല്‍ കലിത പറഞ്ഞു.
പൊലിസ് നടപടി ആവിഷ്‌കാര സ്വാതന്ത്ര്യത്തിനുമേലുള്ള കടന്നുകയറ്റമാണെന്നും ഇത് ജനാധിപത്യത്തിന് ഗുണകരമാവില്ലെന്നും കലിത അഭിപ്രായപ്പെട്ടു.