മലപ്പുറം: കാലവര്‍ഷക്കെടുതിയുടെ പശ്ചാത്തലത്തില്‍ ഒഴിവാക്കിയ ഹയര്‍ സെക്കന്‍ഡറി ഒന്നാം പാദവാര്‍ഷിക പരീക്ഷയുടെ ചോദ്യപേപ്പറുകള്‍ വിതരണം ചെയ്തു തുടങ്ങി. രണ്ടാംവര്‍ഷ വിദ്യാര്‍ഥികളുടെ ഒന്നാം പാദവാര്‍ഷിക പരീക്ഷയുടെ ചോദ്യപേപ്പറുകളാണ് ജില്ലാകേന്ദ്രങ്ങള്‍ വഴി വിതരണം ചെയ്യുന്നത്.
ഇവിടെ നിന്ന് സ്‌കൂള്‍ പ്രിന്‍സിപ്പല്‍മാരോ ബന്ധപ്പെട്ട ഉദ്യോഗസ്ഥരോ 29നകം സ്വീകരിക്കാനാണ് നിര്‍ദേശം. ഇത് ഒക്ടോബര്‍ 15നകം ക്ലാസില്‍ വിദ്യാര്‍ഥികള്‍ക്ക് വിതരണം ചെയ്ത് ചര്‍ച്ച നടത്താനാണ് തീരുമാനം. ഒരോ വിഷയങ്ങളുടേയും ചോദ്യപേപ്പറുകള്‍ അതത് വിഷയങ്ങള്‍ എടുക്കുന്ന അധ്യാപകരുടെ മേല്‍നോട്ടത്തില്‍ ചര്‍ച്ച ചെയ്തുവെന്ന് ഉറപ്പാക്കാന്‍ സ്‌കൂള്‍ പ്രിന്‍സിപ്പല്‍മാരെ ചുമതലപ്പെടുത്തിയിട്ടുണ്ട്.