തിരുവനന്തപുരം: നെടുങ്കണ്ടം കസ്റ്റഡി മരണത്തില്‍ ആരോപണ വിധേയനായ ഇടുക്കി എസ്.പി കെ.ബി വേണുഗോപാലിനെ സ്ഥലം മാറ്റി. ഭീകരവിരുദ്ധ സ്‌ക്വാഡിലേക്കാണ് സ്ഥലം മാറ്റം. മലപ്പുറം എസ്.പി ടി. നാരായണന്‍ ഇടുക്കി എസ്.പിയായി പകരം ചുമലയേല്‍ക്കും.

നെടുങ്കണ്ടം കസ്റ്റഡി മരണവുമായി ബന്ധപ്പെട്ട് അന്വേഷണ സംഘ തലവനായ ക്രൈംബ്രാഞ്ച് എസ്.പി സാബു മാത്യു അന്വേഷണ റിപ്പോര്‍ട്ട് ഉന്നത പൊലിസ് മേധാവികള്‍ക്ക് നല്‍കിയിരുന്നു. ഇതിന്റെ അടിസ്ഥാനത്തില്‍ എസ്.പിക്കെതിരായി പരാമര്‍ശമുള്ളതിനാലാണ് സ്ഥലം മാറ്റിയതെന്നാണ് ലഭിക്കുന്ന സൂചന. സി.പി.ഐ ജില്ലാകമ്മിറ്റി ഉള്‍പ്പെടെ എസ്.പിക്കെതിരേ പരസ്യമായി രംഗത്തുവന്നത് സര്‍ക്കാരിന് വലിയ തലവേദനയായിരുന്നു.

കസ്റ്റഡി മരണം സംബന്ധിച്ച റിമാന്‍ഡ് റിപ്പോര്‍ട്ട് കഴിഞ്ഞ ദിവസം പുറത്തു വന്നപ്പോള്‍ രാജ്കുമാറിന് ക്രൂരമായ മര്‍ദ്ദനമാണ് ഏല്‍ക്കേണ്ടി വന്നതെന്ന് അതില്‍ സൂചിപ്പിച്ചുരന്നു. നെടുങ്കണ്ടം പൊലിസ് സ്റ്റേഷന്‍ എസ്.ഐ സാബു ഉള്‍പ്പെടെയുള്ള പ്രതികള്‍ ഇപ്പോള്‍ റിമാന്‍ഡിലാണ്.