എടപ്പാള്‍: വികസന പദ്ധതികള്‍ അവതരിപ്പിക്കേണ്ട പഞ്ചായത്ത് സ്ഥിരം സമിതി ചെയര്‍മാന്‍ കെ കൃഷ്ണദാസ് പങ്കെടുക്കാതെ വികസന സെമിനാര്‍ നടത്തിയത് വിവാദമായി. ഇന്നലെ നടന്ന എടപ്പാള്‍ പഞ്ചായത്ത് വികസന സമിതി സെമിനാറാണ് വിവാദമായത്.
പഞ്ചായത്തില്‍ ഭരണം നടത്തുന്ന സി.പി.എമ്മിലെ വിഭാഗീയതയാണ് ബഹിഷ്‌കരണത്തിലേക്ക് നയിച്ചതെന്നാണ് അറിയുന്നത്. വികസന സെമിനാര്‍ സെമിനാര്‍ നടത്തുന്ന വിവരം ബുധനാഴ്ച രാത്രിയാണ് അറിഞ്ഞതെന്നും അതിനാല്‍ വേണ്ടണ്ടത്ര തയ്യാറെടുപ്പുകള്‍ നടത്താന്‍ സമയം ലഭിക്കാത്തതിനാലാണ് പങ്കെടുക്കാതിരുന്നതെന്ന് കെ.കൃഷ്ണദാസ് പറഞ്ഞു.
പഞ്ചായത്ത് തിരഞ്ഞെടുപ്പിന് ശേഷം മുതിര്‍ന്ന സി.പി.എം അംഗം കെ.കൃഷ്ണദാസിനെ പ്രസിഡന്റാക്കുമെന്നാണ് പ്രതീക്ഷിച്ചിരുന്നെങ്കിലും അദേഹത്തെ ഒഴിവാക്കി പുതുമുഖ അംഗവും യുവ നേതാവുമായ ബിജോയിയെ പ്രസിഡന്റാക്കുകയും ചെയ്തിരുന്നു. ഇതേ തുടര്‍ന്ന് പാര്‍ട്ടിക്കകത്ത് രൂപപ്പെട്ട അസ്വാരസ്യമാണ് ഇപ്പോള്‍ മറ നീക്കി പുറത്ത് വന്നിട്ടുള്ളത്.