അങ്കമാലി:  പട്ടണത്തിലും പരിസര പ്രദേശങ്ങളിലും ബസുകളില്‍ യാത്ര ചെയ്ത് യാത്രക്കാരുടെ ബാഗുകളില്‍ നിന്ന് പണവും മറ്റ് സാധനങ്ങളും മോഷണം നടത്തുന്ന തമിഴ് സംഘത്തിലെ രണ്ട് യുവതികളെ അങ്കമാലി പൊലിസ് പിടികൂടി.
തമിഴ്‌നാട് പൊളാച്ചി മാരിയമ്മന്‍ കോവില്‍ തെരുവില്‍ കാര്‍ത്തിയുടെ ഭാര്യ ധനമ്മ (21), രാമിന്റെ ഭാര്യ ചന്ദനമാരി (20) എന്നിവരാണ് പിടിയിലായത്.
വെള്ളിയാഴ്ച്ച രാത്രി കോതം മംഗലത്ത് നിന്ന് തൃശൂര്‍ക്കുള്ള യാത്രക്കിടയില്‍ മുകുന്ദപുരം സ്വദേശിനി  ഷിജി സുരേഷിന്റെ ബാഗില്‍ നിന്നും 9800 രൂപ കവര്‍ച്ച ചെയ്ത സംഭവത്തിലാണ് ഇവര്‍ പിടിയിലായത്. ഷിജിക്ക് ഫോണ്‍ വന്നതിനെ തുടര്‍ന്ന് ഫോണ്‍ എടുക്കുവാന്‍ ബാഗ് തുറന്നപ്പോഴാണ് പണം നഷ്ടപ്പെട്ടത് അറിഞ്ഞത്.
തുടര്‍ന്ന് ബസിലെ യാത്രക്കാരില്‍ നടത്തിയ പരിശോധനയിലാണ് ധനമ, ചന്ദന മാരി എന്നിവരില്‍ പണം കണ്ടെത്തിയത്.
തിരക്കുള്ള ബസുകളില്‍ ഗര്‍ഭണികളാണന്ന തരത്തില്‍ വസ്ത്രധാരണം നടത്തി യാത്രക്കാരുടെ സഹതാപം പിടിച്ച് പറ്റി ഇരുപ്പിടം തരപ്പെടുത്തിയാണ് ഇവര്‍ മോഷണം നടത്തുന്നത്. പ്രതികളെ കോടതിയില്‍ ഹാജരാക്കി.