കാബൂള്‍: അഫ്ഗാനിസ്ഥാനില്‍ തെരഞ്ഞെടുപ്പ് റാലിക്ക് നേരെയുണ്ടായ ചാവേര്‍ ആക്രമണത്തില്‍ 13 പേര്‍ മരിച്ചു. 25 പേര്‍ക്ക് പരുക്കേറ്റു. കിഴക്കന്‍ നാംഗര്‍ഹാര്‍ പ്രവിശ്യയില്‍ ഇന്നലെയാണ് ആക്രമണമുണ്ടായത്. ജലാലാബാദിലെ കമാ ജില്ലയില്‍ പാര്‍ലമെന്റ് സ്ഥാനാര്‍ഥി അബ്ദുല്‍ നാസര്‍ മുമന്‍ഡിന്റെ റാലിക്ക് നേരെയാണ് ആക്രമണമുണ്ടായത്.
ഒക്ടബോര്‍ 20നാണ് പാര്‍ലമെന്റ് തെരഞ്ഞെടുപ്പ് നടക്കുന്നത്. ആക്രമണത്തില്‍ നിന്ന് പ്രവിശ്യ ഗവര്‍ണര്‍ അതാഉല്ല കോംഗ്യാനി രക്ഷപ്പെട്ടു. എന്നാല്‍ ഇദ്ദേഹത്തിന് പരുക്കേറ്റെന്ന കാര്യം വ്യക്തമല്ല. ആക്രമണത്തിന്റെ ഉത്തരവാദിത്വം ആരും ഇതുവരെ ഏറ്റെടുത്തിട്ടില്ല.
തെരഞ്ഞെടുപ്പിനോട് അനുബന്ധിച്ച് അഞ്ചോളം സ്ഥാനാര്‍ഥികള്‍ ആക്രമണങ്ങളില്‍ കൊല്ലപ്പെട്ടുവെന്നാണ് തെരഞ്ഞെടുപ്പ് കമ്മിഷന്റെ റിപ്പോര്‍ട്ട്. വോട്ട് രേഖപ്പെടുത്തുന്നതില്‍ വിട്ടുനില്‍ക്കണമെന്ന് താലിബാനും ഐ.എസും ജനങ്ങളോട് ആവശ്യപ്പെട്ടിരുന്നു. അടുത്ത വര്‍ഷം നടക്കുന്ന പ്രസിഡന്റ് തെരഞ്ഞെടുപ്പിനോട് അനുബന്ധിച്ച് നടക്കുന്ന പാര്‍ലമെന്റ് തെരഞ്ഞെടുപ്പില്‍ 2500 സ്ഥാനാര്‍ഥികളാണുള്ളത്.