തൃശൂര്‍: യാതൊരു വിധ രേഖകളോ ലൈസന്‍സോ ഇല്ലാതെ തൃശൂര്‍ പൂങ്കുന്നം ഹരിനഗറില്‍ പ്രവര്‍ത്തിച്ചുവരുന്ന പാര്‍ക്ക് ഫീല്‍ഡ് എന്ന വൃദ്ധസദനം ജില്ലാ ഭരണകൂടം അടച്ചുപൂട്ടി.
നടത്തിപ്പുകാരിക്കെതിരേ തൃശൂര്‍ വെസ്റ്റ് പൊലിസ് കേസെടുത്തു. അന്തേവാസികളായ വൃദ്ധജനങ്ങളെ യാതൊരു പരിരക്ഷയും നല്‍കാതെ പൂട്ടിയിട്ടുവെന്ന പരാതിയിന്മേല്‍ നടത്തിയ അന്വേഷണത്തിലാണ് സബ് കലക്ടര്‍ ഡോ. രേണുരാജ്, ജില്ലാ സാമൂഹ്യനീതി ഓഫിസര്‍ എസ്. സുലക്ഷണ എന്നിവരുടെ നേതൃത്വത്തില്‍ സ്ഥാപനം പൂട്ടിയത്. പരിതാപകരമായ അവസ്ഥയില്‍ കഴിഞ്ഞ ഇവിടുത്തെ അന്തേവാസികളെ രാമവര്‍മ്മപുരത്തെ സര്‍ക്കാര്‍ വൃദ്ധ സദനത്തിലേക്ക് മാറ്റി. മൂന്ന് പേരായിരുന്നു ഇവിടെ ഉണ്ടായിരുന്നത്.
ഇവരുടെ ബന്ധുക്കളെ വിവരമറിയിച്ചു. സ്ഥാപനത്തിന്റെ നടത്തിപ്പുകാരിയായ മീര എന്നയാള്‍ക്ക് ഇത് സംബന്ധിച്ച് നോട്ടീസ് നല്‍കി. സംഭവം സംബന്ധിച്ച് തൃശൂര്‍ വെസ്റ്റ് പൊലിസ് അന്വേഷണം തുടങ്ങി. ഓരോ അന്തേവാസിയുടെ പേരിലും സംഭാവനയായി രണ്ടര ലക്ഷം രൂപയും പ്രതിമാസം പതിനാറായിരം രൂപയും മുതല്‍ മുകളിലേക്കും രസീത് നല്‍കാതെ കൈപ്പറ്റിയായിരുന്നു പാര്‍ക്ക് ഫീഡിന്റെ പ്രവര്‍ത്തനം. ഓര്‍ഫേനജ് കണ്‍ട്രോള്‍ ബോര്‍ഡിന്റെ അനുമതിയോ, തൃശൂര്‍ കോര്‍പ്പറേഷന്റെ ലൈസന്‍സോ, ആവശ്യമായ രേഖകളോ ഇല്ലാതെയായിരുന്നു സ്ഥാപനത്തിന്റെ പ്രവര്‍ത്തനം. കോര്‍പ്പറേഷന്‍ കൗണ്‍സിലര്‍മാരായ ലളിതാംബിക, രാവുണ്ണി പരിശോധനയില്‍ പങ്കെടുത്തു.