ആലപ്പുഴ: സി.പി.ഐ ആലപ്പുഴ ജില്ലാ കമ്മിറ്റി ഓഫിസ് മതിലില്‍ സംസ്ഥാന സെക്രട്ടറി കാനം രാജേന്ദ്രനെതിരേ പോസ്റ്ററൊട്ടിച്ച മൂന്ന് പേരെ പാര്‍ട്ടിയില്‍ നിന്നും പുറത്താക്കി. എ.ഐ.വൈ.എഫ് ജില്ലാ കമ്മിറ്റി അംഗം ജയേഷ് മണ്ഡലം കമ്മിറ്റി അംഗം ഷിജു, കിസാന്‍ സഭ മണ്ഡലം പ്രസിഡന്റ് കൃഷ്ണകുമാര്‍ എന്നിവരെയാണ് പാര്‍ട്ടി വിരുദ്ധ പ്രവര്‍ത്തനത്തിന്റെ പേരില്‍ പുറത്താക്കിയിരിക്കുന്നത്.

ഇതില്‍ ജയേഷ്, ഷിജു എന്നിവരെ പൊലിസ് പുറത്താക്കിയിരുന്നു. കൃഷ്ണകുമാര്‍ ഒളിവിലാണ് എന്നാണ് ലഭിക്കുന്ന വിവരം. കഴിഞ്ഞ ദിവസം രാത്രിയാണ് മതിലില്‍ കാനത്തിനെതിരേയുള്ള പോസ്റ്റര്‍ പ്രത്യക്ഷപ്പെട്ടത്. അതിന്റെ സി.സി.ടി.വി ദൃശ്യങ്ങള്‍ പുറത്തു വന്നിരുന്നു. തുടര്‍ന്ന് പോസ്റ്റര്‍ ഒട്ടിക്കാനെത്തിയ സംഘം സഞ്ചരിച്ച കാര്‍ പൊലിസ് കസ്റ്റഡിയിലെടുത്തിരുന്നു.

കാര്‍ ഉടമയെ കസ്റ്റഡിയിലെടുത്ത് ചോദ്യം ചെയ്തപ്പോള്‍ സംഭവത്തെക്കുറിച്ച് അറിയില്ലെന്നും കാര്‍ സുഹൃത്ത് കൊണ്ടുപോയതാണന്നുമാണ് പറഞ്ഞത്. അമ്പലപ്പുഴ സ്വദേശിയാണ് ഇയാള്‍. അതേസമയം സി.സി.ടി.വി ദൃശ്യങ്ങള്‍ പരിശോധിച്ച് പൊലിസ് നടത്തിയ അന്വേഷണത്തിലാണ് സംഭവത്തിന് പിന്നില്‍ സി.പി.ഐ നേതാക്കള്‍ തന്നെയാണെന്ന കാര്യം പുറത്തുവന്നത്.