തിരുവനന്തപുരം: ദേശീയ ആരോഗ്യസുരക്ഷാ പദ്ധതിയായ ആയുഷ്മാന്‍ ഭാരതില്‍ കേരളവും ചേരുമെന്ന് ആരോഗ്യവകുപ്പ് മന്ത്രി കെ.കെ ശൈലജ ടീച്ചര്‍. നിവൃത്തിയില്ലാത്തതിനാലാണ് ചേരുന്നതെന്ന് മന്ത്രി പറഞ്ഞു. കാരണം, ചേര്‍ന്നില്ലെങ്കില്‍ ആര്‍.എസ്.ബി.വൈ സംസ്ഥാനത്തിന് ലഭിക്കുന്ന 102 കോടി രൂപ നഷ്ടമാവും. ഇത് ആര്‍.എസ്.ബി.വൈയില്‍ ഉള്‍പ്പെട്ടിട്ടുള്ള 21.5 ലക്ഷം കുടുംബങ്ങളെയും ബാധിക്കും. ഇവര്‍ ആരോഗ്യ സുരക്ഷാ പദ്ധതിയില്‍ നിന്നും പുറത്താകുമെന്നും മന്ത്രി പറഞ്ഞു.

ആര്‍.എസ്.ബി.വൈ ഈ വര്‍ഷം അവസാനത്തോടെ ആയുഷ്മാന്‍ ആരോഗ്യസുരക്ഷാ പദ്ധതിയില്‍ ലയിപ്പിക്കും. അതിനാല്‍ ആയുഷ്മാനില്‍ ചേര്‍ന്നില്ലെങ്കില്‍ കേരളത്തിലെ ജനങ്ങള്‍ക്ക് ആരോഗ്യസുരക്ഷ നഷ്ടമാവും. നിവൃത്തിയില്ലാത്തതിനാലും ജനങ്ങളുടെ സുരക്ഷയിന്മേലുമാണ് കേരളം പദ്ധതിയുടെ ഭാഗമാവുന്നതെന്നും മന്ത്രി പറഞ്ഞു.

ആരോഗ്യരംഗത്ത് മുമ്പിലുള്ള കേരളം, ഒഡീഷ, തെലുങ്കാന, ഡല്‍ഹി, പഞ്ചാബ് തുടങ്ങിയ സംസ്ഥാനങ്ങള്‍ പദ്ധതിയില്‍ ചേരുന്നില്ലെന്ന് വ്യക്തമാക്കിയിരുന്നു. എന്തെന്നാല്‍, ഇവിടങ്ങളിലെല്ലാം മികച്ച രീതിയില്‍ ഇന്‍ഷുറന്‍സ് പദ്ധതി നടപ്പിലാക്കി വരുന്നുണ്ട്. ആര്‍.എസ്.ബി.വൈ, ചിസ്, ചിസ് പ്ലസ് പദ്ധതികളില്‍ 1785 രോഗ ചികിത്സാ പാക്കേജുകളാണ് ഉള്‍പ്പെട്ടിട്ടുള്ളത്. എന്നാല്‍, ആയുഷ്മാനില്‍ 1350 രോഗചികിത്സാ പാക്കേജുകള്‍ മാത്രമാണ് ഉള്ളത്.