ചെറുവത്തൂര്‍: അന്യംനിന്നുപോകുന്ന നാടന്‍ ഭക്ഷ്യവൈവിധ്യങ്ങളെ പുതുതലമുറയ്ക്കു പരിചയപ്പെടുത്തി 'താളിന്‍ പോള പുളിശ്ശേരി.. കാമ്പും കൂമ്പും ഉപ്പേരി...' ചന്തേര ഇസ്സത്തുല്‍ ഇസ്‌ലാം എ.എല്‍.പി സ്‌കൂളിലാണ് ലോക ഭക്ഷ്യദിനത്തില്‍ നാടന്‍രുചികള്‍ അമ്മമാര്‍ കുട്ടികള്‍ക്കു പകര്‍ന്നു നല്‍കിയത്. വീട്ടുപരിസരങ്ങളില്‍നിന്നു ലഭിക്കുന്ന പപ്പായ, കാമ്പ്, കൂമ്പ് , മരച്ചീനി, ചേന, ചേമ്പ്, താളിന്‍ പോള, ഭക്ഷ്യയോഗ്യമായ ഇലകള്‍ എന്നിവയുമായാണ് കുട്ടികള്‍ ഇന്നലെ വിദ്യാലയത്തിലെത്തിയത്. തുടര്‍ന്ന് ഇവയുടെ പ്രദര്‍ശനവും ഒരുക്കി. അമ്മക്കൂട്ടം അംഗങ്ങള്‍ വിഭവങ്ങള്‍ ഒരുക്കി. വിഭവങ്ങള്‍ തയാറാക്കുന്നതും കുട്ടികള്‍ നേരിട്ടുകണ്ടു.
പപ്പായയും താളിന്‍ പോളയും പുളിശ്ശേരി, കാമ്പ് ഉപ്പേരി, കൂമ്പ് ഉപ്പേരി, മുരിങ്ങയില ഉപ്പേരി, ചേനയില വറവ്, ചേന വറവ്, ചീരക്കറി,ത വരയില വറവ് തുടങ്ങിയവയായിരുന്നു വിഭവങ്ങള്‍. സ്‌കൂള്‍ പ്രധാനധ്യാപിക സി.എം മീനാകുമാരി ഉദ്ഘാടനം ചെയ്തു. എം.പി.ടി.എ പ്രസിഡന്റ് രമ്യാ രാജു അധ്യക്ഷയായി.