ന്യൂഡല്‍ഹി: മുനമ്പം മനുഷ്യക്കടത്തില്‍ കാണാതായവരെ കണ്ടെ ത്താന്‍ കേന്ദ്രസര്‍ക്കാര്‍ ഇടപെടണമെന്നാവശ്യപ്പെട്ട് ഡല്‍ഹി ജന്തര്‍ മന്ദറില്‍ ബന്ധുക്കളുടെ പ്രതിഷേധം. സാധാരണ ബോട്ടില്‍ വിദേശരാജ്യത്തേക്ക് പോയെന്ന് സംശയിക്കുന്ന 243 പേരടങ്ങുന്ന സംഘത്തെയാണ് ഏഴു മാസം മുന്‍പ് കാണാതായത്.
ഇക്കാര്യം ആവശ്യപ്പെട്ട് കേന്ദ്രസര്‍ക്കാരിനെ സമീപിച്ചെങ്കിലും ഇതുവരെ നടപടി ഉണ്ടാകാത്ത സാഹചര്യത്തിലാണ് സമരമെന്ന് ബന്ധുക്കള്‍ പറഞ്ഞു.
കേരള തീരത്തു നിന്നാണ് ഇവര്‍ യാത്ര പുറപ്പെട്ടത്. കേരള പൊലിസിലെ സ്‌പെഷല്‍ബ്രാഞ്ച്, തമിഴ്‌നാട് ക്യൂബ്രാഞ്ച്, ഐ.ബി, മിലിറ്ററി ഇന്റലിജന്‍സ് തുടങ്ങിയവരൊക്കെ അന്വേഷിച്ചിട്ടും കണ്ടെത്താനായില്ല. അന്വേഷണത്തിന് ഇന്റര്‍പോളിന്റെ സഹായം തേടിയെങ്കിലും ഫലമുണ്ടായില്ല. സാധാരണ മീന്‍പിടിത്ത ബോട്ടിലാണ് ഇവരെ കൊണ്ടുപോയത്.