കൊച്ചി: ഡി.ഐ.ജി ഓഫിസ് മാര്‍ച്ചിനിടെ പൊലിസിനെ അക്രമിച്ചുവെന്ന കേസില്‍ സി.പി.ഐ പെരുമ്പാവൂര്‍ ലോക്കല്‍ കമ്മിറ്റി അംഗവും എ.ഐ.വൈ.എഫ് മണ്ഡലം ജോയിന്റ് സെക്രട്ടറിയുമായ അന്‍സാര്‍ അലി അറസ്റ്റില്‍. ജാമ്യമില്ലാ വകുപ്പുപ്രകാരമാണ് ഇയാള്‍ക്കെതിരേ കേസെടുത്തിരിക്കുന്നത്.
ലാത്തിച്ചാര്‍ജുമായി ബന്ധപ്പെട്ട് സെന്‍ട്രല്‍ എസ്.ഐ വിപിന്‍ദാസിനെ കഴിഞ്ഞദിവസം സസ്‌പെന്‍ഡ് ചെയ്തിരുന്നു. അതേസമയം, ലാത്തിച്ചാര്‍ജ് വിവാദവുമായി ബന്ധപ്പെട്ട് സി.പി.ഐ പ്രവര്‍ത്തകനെ അറസ്റ്റ് ചെയ്തത് പൊലിസിന്റെ പ്രതികാരനടപടിയാണെന്ന് പാര്‍ട്ടി എറണാകുളം ജില്ലാ സെക്രട്ടറി പി. രാജു ആരോപിച്ചു. എസ്.ഐ വിപിന്‍ദാസിനെ സസ്‌പെന്‍ഡ് ചെയ്തതിലുള്ള പ്രതികാരമാണ് പൊലിസ് നടപ്പാക്കുന്നത്.
നടപടിക്രമങ്ങള്‍ പാലിച്ചല്ല അറസ്റ്റ്. എസ്.ഐ വിപിന്‍ ദാസ് തെറ്റുകാരനാണ്. അയാളുടെ മൊഴിയുടെ അടിസ്ഥാനത്തില്‍ പ്രവര്‍ത്തകരെ അറസ്റ്റ് ചെയ്യാന്‍ പാടില്ല.
പൊലിസ് നടപടിക്കെതിരേ നിയമ നടപടി സ്വീകരിക്കുമെന്നും അദ്ദേഹം പറഞ്ഞു.