മൂവാറ്റുപുഴ: ഹെറോയിനും കഞ്ചാവുമായി രണ്ട് അന്യസംസ്ഥാനക്കാര്‍ എക്‌സൈസ് സംഘത്തിന്റെ പിടിയിലായി. കീച്ചേരിപ്പടി കൊച്ചക്കോന്‍ ഹാളിന്റെ മുമ്പില്‍ നിന്നും 340ഗ്രാം കഞ്ചാവുമായി മുര്‍ഷിദാബാദ് സ്വദേശി റെന്റു മണ്ഡല്‍ (31), കീച്ചേരിപ്പടി ഓട്ടോ സ്റ്റാന്റിന് സമീപം പുളിയങ്കണ്ടത്ത് റോഡില്‍ നിന്നും 10ഗ്രാം കഞ്ചാവും 16 പൊതികളിലായി 330 മി.ഗ്രാം ഹെറോയിനുമായി മൂര്‍ഷിദാബാദ് സ്വദേശി ഹൈദര്‍ ഷാ (42) എന്നിവരെയാണ് മുവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ.കെ അനില്‍കുമാറിന്റെ നേതൃത്വത്തില്‍ പിടികൂടിയത്.
നഗരത്തിലെ രണ്ടിടങ്ങളിലായി നടന്ന റെയ്ഡില്‍ പിടികൂടിയത്. മുവാറ്റുപുഴ ടൗണിലെ വിവിധ ഭാഗങ്ങളിലായി അന്യസംസ്ഥാന തൊഴിലാളികള്‍ക്കിടയില്‍ മയക്കുമരുന്ന് വില്‍പന നടക്കുന്നുണ്ടന്ന് മുവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടന്ന റെയ്ഡിലാണ് പ്രതികള്‍ പിടിയിലായത്.
മുവാറ്റുപുഴ എക്‌സൈസ് സര്‍ക്കിള്‍ ഓഫിസില്‍ കഴിഞ്ഞ ഒരാഴ്ചക്കിടയില്‍ മുവാറ്റുപുഴ കീച്ചേരിപ്പടി, കാവുംങ്കര, മാര്‍ക്കറ്റ് പരിസരം, കടാതി, പേഴയ്ക്കാപ്പിള്ളി ഭാഗങ്ങളില്‍ നിന്നായി പിടികൂടിയതടക്കം അഞ്ചാമത്തെ കേസാണിത്. പ്രതികള്‍ നാട്ടില്‍ പോയിട്ടു തിരികെ വരുമ്പോള്‍ കടത്തി കൊണ്ട് വരുന്ന കഞ്ചാവും ഹെറോയിന്‍ എന്നിവ ചെറിയ പൊതികളിലാക്കി ആവശ്യകാര്ക്ക് 500രൂപ, 1000രൂപ നിരക്കിലാണ് വില്‍പന നടത്തിയിരുന്നത്. റെയ്ഡിന് പ്രീവന്റിവ് ഓഫീസര്‍മാരായ വി.എ.ജബ്ബാര്‍, ഇ.കെ.ഹരി, സിവില്‍ എക്‌സൈസ് ഓഫീസര്‍മാരായ എ.എം.കൃഷ്ണകുമാര്‍, മനു ജോര്‍ജ്, എം.വി.ബിജു, ജിജി എന്‍ ജോസഫ്, കെ.ജി.അജീഷ് ഡ്രൈവര്‍ റെജി എന്നിവര്‍ പങ്കെടുത്തു. മയക്കുമരുന്ന് കുറ്റകൃത്യങ്ങളില്‍ ഏര്‍പ്പെടുന്നവരെക്കുറിച്ചുള്ള വിവരങ്ങള്‍ പൊതുജനങ്ങള്‍ 04852832623, 9400069564 എന്നീ നമ്പറുകളില്‍ അറിയിക്കണമെന്ന് മുവാറ്റുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ അഭ്യര്‍ഥിച്ചു.