മണ്ണാര്‍ക്കാട്: ജനവാസ മേഖലയില്‍ വീണ്ടും കാട്ടാനക്കൂട്ടം വ്യാപകമായി കൃഷി നശിപ്പിച്ചു. എടത്തനാട്ടുകര പിലാഞ്ചോലയിലെ പാണ്ടിക്കോട്, കല്ലംപള്ളിയില്‍, കിളയപ്പാടം എന്നിവിടങ്ങളിലാണ് കാട്ടാനക്കൂട്ടമിറങ്ങിയത്. മൂന്ന് കുട്ടിയാനയടക്കം 11 കാട്ടാനകളാണ് ഇന്നലെ കാടിറങ്ങി നാടിനെ വിറപ്പിച്ചത്. കഴിഞ്ഞ രണ്ടാഴ്ചയോളമായി കാട്ടാനകളുടെ സംഹാരതാണ്ഡവമാണ് പ്രദേശത്തുണ്ടായിരിക്കുന്നത്. ലക്ഷക്കണക്കിന് രൂപയുടെ കൃഷിനാശമാണ് പ്രദേശത്തുണ്ടയിരിക്കുന്നത്.
വ്യാഴാഴ്ച രാത്രി പത്തരയോടെ പിലാകുന്നിലെ സ്വകാര്യ വ്യക്തിയുടെ റബര്‍ തോട്ടത്തിലൂടെ പുളിയം തോട്ടിലേക്ക് ഇറങ്ങിയ കാട്ടാനകൂട്ടം, തോടും തോടരുകും ചേര്‍ന്ന് മുകള്‍ ഭാഗത്തേക്ക് നീങ്ങി. തുടര്‍ന്ന് കിളയപ്പാടം, കല്ലംപള്ളിയാല്‍ എന്നിവിടങ്ങളിലെ ജനവാസ മേഖലകളില്‍ ഭീതി പരത്തി. തുടര്‍ന്ന് തടിച്ചുകൂടിയ ജനം കാട്ടാനകളെ തുരത്താന്‍ ശ്രമം നടത്തി. രാത്രി രണ്ട് മണിയോടെ പാണ്ടിക്കോട് ജനവാസ മേഖലയില്‍ എത്തിയ കാട്ടാനകള്‍ വ്യാപകമായി കൃഷി നശിപ്പിച്ചു.
നേരം പുലരുവോളം താണ്ഡവമാടിയ കാട്ടാനകൂട്ടത്തെ കാടുകയറ്റാനായില്ല. വീട് പണിയെ തുടര്‍ന്ന് ഓലഷെഡില്‍ അന്തിയുറങ്ങുന്ന മുസ്തഫയും കുടുംബവും തൊട്ടടുത്ത പാറയുടെ പുറത്ത് ഇരുന്നാണ് നേരം വെളുപ്പിച്ചത്. നേരം പുലര്‍ന്നതോടെ എത്തിയ വനപാലകരും നാട്ടുകാരും ചേര്‍ന്ന് കാട്ടാനകളെ തുരത്താനുള്ള ശ്രമം നടത്തിയെങ്കിലും വൈകിട്ട് നാല് മണിയോടെയാണ് കാട്ടിലേക്ക് കയറ്റിയത്.